अमेरिकामा दोस्रो जितको खोजी 

आठ खेल खेल्दा कमजोर प्रदर्शन गर्दै एक मात्र जित निकालेको नेपाल तालिकाको सातौँ स्थानमा

आइसिसी विश्वकप लिग–२ शृंखलामा कमजोर सुरुवात गरेको नेपालले दोस्रो जित निकाल्न आइतबार अमेरिकासँग खेल्दै छ । घरेलु टोलीविरुद्ध डालासमा खेल्दा नेपाल दोस्रो जित निकाल्ने दाउमा छ । शृंखलामा नेपालले घरेलु टोली अमेरिकासँगै साबिक विजेता स्कटल्यान्डसँग खेल्ने तालिका छ । 

प्रतियोगितामा आठ खेल खेल्दा नेपालले मात्र एक जित निकालेको छ । युएईभन्दा माथि रहँदा नेपाल तालिकाको सातौँ स्थानमा छ । क्यानडा १२ खेलबाट १६ अंकसहित तालिकाको शीर्ष स्थानमा छ । रोहितकुमार पौडेलको कप्तानीमा अघिल्लो सिजन सनसनी १२ मध्ये ११ जित निकाल्दै एकदिवसीय मान्यता जोगाएको नेपालको यसपटक सुरुवात भने कमजोर रह्यो । पछिल्ला ६ मध्ये एक खेल अनिर्णीत हुँदा पाँच खेलमा पराजित भएको छ । क्यानडामा भएको अघिल्लो शृंखलाका चारै खेल नेपालले गुमायो । 

लगातारको खराब प्रदर्शनपछि नेपाल क्रिकेट संघ (क्यान)ले सल्लाहकारमा क्यानडाका नागरिक तथा पूर्वप्रशिक्षक पुबुदु दसानायकेलाई अनुबन्ध गरेको छ । क्यानकै अनुसार उनको आगमनले नेपाली टोलीको ब्याटिङमा सुधार हुने अनुमान गरिएको छ । त्यसको छनक पनि देखिएको छ । अमेरिकासँग भएको तीन टी–२० शृंखलामा नेपाल ‘क्लिन स्विप’ गर्न सफल भयो । 

लिग टुमा नेपालले पहिलो खेल आइतबार घरेलु टोली अमेरिकासँग खेल्दा मंगलबार स्कटल्यान्डसँग दोस्रो खेल खेल्नेछ । त्यसपछि २ नोभेम्बरमा अमेरिका र ४ नोभेम्बरमा अन्तिम खेल स्कटल्यान्डविरुद्ध खेल्ने तालिका छ । 

सन्दीपलाई समेट्दै टिम घोषणा 
शनिबार प्रशिक्षक मोन्टी देशाईले नेपाल, अमेरिका र स्कटल्यान्डबिच हुने खेलका लागि १५ सदस्यीय टिम घोषणा गरेका छन् । रोहित पौडेलको कप्तानीमा रहेको टोलीमा सन्दीप लामिछाने समेटिएका छन् । उनी अघिल्लो साता अमेरिका पुगेका हुन् । यसअघि अमेरिकामै भएको टी–२० शृंखलामा नेपालले ‘क्लिन स्विप’ गर्दा उनी भिसाका कारण टिममा थिएनन् । टी–२० शृंखलामा रहेका बलर सागर ढकाल र ब्याटर देव खनाल रिजर्भमा छन् । नेपाली टोलीमा रोहित र सन्दीपसहित कुशल भुर्तेल, आसिफ सेख, अनिलकुमार साह, भीम सार्की, आरिफ सेख, कुशल मल्ल, दीपेन्द्रसिंह ऐरी, अर्जुन साउद, सोमपाल कामी, करण केसी, गुल्सन झा, रिजन ढकाल र ललित राजवंशी छन् ।