- वि.सं २o८१ भदौ ९ आइतबार
१५ साउन ममतालाई उनका श्रीमान् नरेशले आफ्नै घरमा हत्या गरेको आशंका प्रहरीको छ । त्यही दिन नरेशले फरक–फरक वालमार्टबाट चक्कु र प्रमाण नष्ट गर्ने सफाइ सामान किनेका थिए । नरेशले ममतालाई १६ साउनमा अन्तिमपटक देखेको सञ्चारमाध्यमलाई बताए ।
अमेरिकाको भर्जिनियास्थित मनासस पार्कस्थित घरबाट तीन सातादेखि (१६ साउन) बेपत्ता काभ्रे पनौतीकी ममता काफ्लेको हत्या भएको आशंका गरिएको छ । अदालतमा प्रहरीले बुझाएको कागजपत्र र विवरणमा श्रीमान् नरेश भट्टले घरमै ममताको नृशंस हत्या गरेर शव बाहिर लगेको हुन सक्ने आशंका गरिएको अमेरिकी सञ्चारमाध्यमले जनाएका छन् । नरेश कञ्चनपुरका हुन् ।
ममतालाई बेपत्ता बनाएको र अनुसन्धानमा सहयोग नगरेको अभियोगमा नरेशलाई मनासस प्रहरीले शुक्रबार पक्राउ गरी अनुसन्धान थालेको छ । उनले १५ साउनमै ममताको हत्या गरेको आशंकासहित घरमा संकलित प्रमाण प्रहरीले अदालतमा बुझाएको छ । २७ वर्षीया ममता नर्स हुन् । नरेशले श्रीमती हराएको विषयमा फरक–फरक र असंगत बयानबाजी दिएको, बजार (वालमार्ट)बाट शंकास्पद रूपमा चक्कु र सफाइ सामान खरिद गरेको तथा ममताको कोठामा रगतका टाटा देखिएको प्रहरी रिपोर्ट अदालतमा पेस भएको अमेरिकी सञ्चारमाध्यमले जनाएका छन् । उनले लाउडन काउन्टी वालमार्टमा लाइसोल र फेब्रेज किनेका थिए । अपराधीहरूले अपराध गरेपछि प्रमाण नष्ट गर्न यस्ता सामान किन्ने गरेको जानकारहरूको भनाइ छ । उनले फरक–फरक वालमार्टबाट चक्कु र प्रमाण नष्ट गर्ने सामान खरिद गरेको विवरण प्रहरीले संकलन गरेको छ । तर, प्रहरीले अदालतमा नरेशलाई हत्याको अभियुक्तका रूपमा प्रस्तुत गरेको छैन । शंकास्पद व्यक्तिका रूपमा पेस गरेको छ ।
३७ वर्षीय नरेशको भर्जिनियास्थित प्रिन्स विलियम काउन्टीका अभियोजक साराह सामीले घरमा रगतको थुप्रो फेला पारेको बताएकी छिन् । यद्यपि, अहिलेसम्म ममताको जीवित वा मृत अवस्था फेला परिसकेको छैन । नरेशले ४ साउनमै टेस्ला गाडी बेचेको र श्रीमती बेपत्ता भएयता घर बेचेर अमेरिकाबाट बाहिरिन लागेको त्यहाँस्थित नेपाली समुदायले आशंका गरेको छ ।
ममता भर्जिनियाको युभिए हेल्थ प्रिन्स विलियम मेडिकल सेन्टरमा नर्स हुन् । आमा बेपत्ता भएपछि र बुबा नरेश पक्राउ परेपछि करिब एक वर्षीया छोरी निमालाई सरकारी संरक्षण केन्द्रमा लगिएको छ ।
शुक्रबारको सुनुवाइका क्रममा वकिलहरूले आशंका गरेको र सुनेभन्दा खराब अवस्था देखिएको बताएका छन् । भट्टले वकिलमार्फत बोल्ने, आफू अंग्रेजीमा कमजोर भएको बताएका थिए । मुद्दाका अभियोजक सामीले अदालतमा बहस गर्ने क्रममा नरेशविरुद्ध थप अभियोग लाग्ने बताएकी थिइन् । ममता घर नआएपछि नरेशले परिवारलाई सम्पर्क नगरेको बरु ममता कार्यरत मेडिकल सेन्टरका सहकर्मीले प्रहरीलाई खबर गरेको पत्ता लागेको छ । शुक्रबारै मेडिकल सेन्टरका प्रवक्ताले सिएनएनलाई ममताको मृत्यु भएको गम्भीर आशंका रहेको भन्दै दुःख व्यक्त गरेका थिए ।
मानसास पार्कका एक प्रहरी अधिकारी १७ साउनमा वेलफेयर चेक गर्न घरमा जाँदा नरेशले ममता हराएको रिपोर्ट गर्न अस्वीकार गरेका थिए । उनले २१ साउनमा मात्रै श्रीमती हराएको विषयमा प्रहरीलाई रिपोर्ट गरेका थिए । नरेशले सुरुमा ममता टेक्सास वा न्युयोर्कमा रहेका साथीहरूलाई भेट्न गएको भन्दै आएका थिए । मनासस पार्क प्रहरी प्रमुख मारियो लुगोले ममताका विषयमा १० टोली खटिएको र सयभन्दा बढी व्यक्तिसँग सोधपुछ गरेको जानकारी दिएका छन् ।
प्रहरीले घर खानतलासी गर्ने क्रममा घर अस्तव्यस्त अवस्थामा भेटेको थियो । सुटकेस प्याक गरिएको थियो, मास्टर बेडरुम र बाथरुममा रगतका टाटा देखिएका थिए । ओछ्यान पनि सारिएको अवस्थामा थियो भने बाथ ट्युबभित्र प्रहरीले रगत भेटेको थियो । प्रहरीले ब्लु स्टार टेक्नोलोजी प्रयोग गरेर रगत फेला पारेको अमेरिकास्थित नेपाली पत्रकारहरूको अन्तर्राष्ट्रिय सञ्जाल नेजाका अध्यक्ष गुणराज लुइँटेलले बताएका छन् । अदालतमा सुनुवाइमा रहेका व्यक्तिहरूले उनलाई दिएको सूचनाअनुसार ठाउँ–ठाउँमा रगत सफा गरेको, कार्पेट, बेडरुममा रगत भेटिएको छ । गलैँचामा अस्वाभाविक खालको गुलाबी रङ भेटिएको प्रहरीले जनाएको छ ।
ममताकी साथी सरिता न्यौपानेका अनुसार नरेशसँग उनको विवाह चार वर्षअघि भएको थियो । विवाह भएको एक वर्षपछि ममता अमेरिका गएकी थिइन् । नरेश फेयरफ्याक्स काउन्टीमा जुन २०२० मा भर्ती भएका थिए, तर २२ दिनमै उनलाई फेयरफ्याक्स काउन्टी क्रिमिनल जस्टिस एकेडेमीले बर्खास्त गरेको थियो । उनी त्यसअघि अमेरिकी सेनामा कार्यरत रहेको र अफगानिस्तान युद्धमा पनि सहभागी भएको अमेरिकी सञ्चारमाध्यमले लेखेका छन् । अमेरिकी सेनाका प्रवक्ता हेथर हागनलाई उद्धृत गर्दै सिएनएनमा प्रकाशित समाचारअनुसार नरेशले २०१७ देखि २०२४ फेबु्रअरीसम्म अमेरिकी सेनाको रेजर्भ अटोमेटेड लजिस्टिक स्पेसलिस्टका रूपमा काम गरेका थिए ।
ममताकी आमा र दाजुलाई अमेरिकी राजदूतावासले अमेरिका जान आपत्कालीन भिसा उपलब्ध गराएको छ । एक वर्षीया छोरीलाई प्रिन्स विलियम काउन्टीको सामाजिक सेवा विभागको हेरचाहमा राखिएको छ ।
ममता बेपत्ता भएदेखि के–के भयो ?
- १२ साउनमा उनी युभिए हेल्थ प्रिन्स विलियम मेडिकल सेन्टर मनाससमा पछिल्लोपटक देखिएकी थिइन् । उनी अमेरिकाको रजिस्टर्ड नर्स हुन् ।
- १३ साउनमा ममताले साथीसँग कुराकानी गरेको र त्यही दिन छोरीसँगको भिडियो टिकटकमा पोस्ट गरेकी थिइन् । कुनै वेला कोठामा साथमा बसेकी नादिया नाभारोलाई ममताले पटक–पटक फोन गरेकी थिइन्, तर सुतिसकेका कारण आफूले थाहा नपाएको नादियाले प्रहरीलाई भनेकी छिन् । ‘ममता जिम्मेवार र शान्त व्यक्ति हुन् । उनी भागेर गइन् भन्ने मलाई रत्तिभर पनि शंका छैन,’ नादियाले भनेकी छिन् ।
- १५ साउनमा ममतालाई उनका श्रीमान् नरेशले हत्या गरेको आशंका प्रहरीको छ । घरमै उनको हत्या भएको आशंका छ । त्यही दिन नरेशले फरक–फरक वालमार्टबाट चक्कु र प्रमाण नष्ट गर्ने सफाइ सामान किनेका थिए । नरेशले ममतालाई १६ साउनमा अन्तिमपटक देखेको सञ्चारमाध्यमलाई बताए ।
- १७ साउनमा प्रहरी नरेश र ममताको घरमा अनुसन्धानका लागि पुगे । अस्पतालमा सातामा दुई दिन काम गर्ने ममता १७ र १८ साउनमा मेलिकल सेन्टरमा ड्युटीका लागि जानुपथ्र्यो । उनी गइनन्, अस्पतालले खबर पनि पाएन । तर, नरेशले श्रीमतीको खोजीका लागि प्रहरीलाई रिपोर्ट गरेनन् ।
- २१ देखि २४ साउनसम्म प्रहरीले घर खानतलासीलगायत अनुसन्धान गर्यो । नरेशले १६ साउनमा उनले श्रीमतीलाई डिनर टेबुलमा अन्तिमपटक देखेको बयान प्रहरीलाई दिए । परिवारसँग पनि ममताको सम्पर्क नभएको, सामाजिक सञ्जालमा पनि नदेखिएको भन्दै बेपत्ता व्यक्ति घोषणा गर्दै प्रहरी ममताको खोजबिनमा लाग्यो ।
- भर्जिनियामा मात्र नभएर अमेरिकाभर रहेका नेपाली समुदायले उनको खोजीका लागि प्रहरी र सरकारलाई दबाब दिइरहे । नेपाली समुदायले स्वतस्फूर्त रूपमा ममतामाथि न्यायका लागि आवाज उठाएका थिए । ममताका हत्या भएको प्रहरी आशंका र त्यहीअनुसारको अदालतमा प्रमाण पेस भएपछि नेपाली समुदाय स्तब्ध छ ।
- ३० साउनमा नरेशले सञ्चारमाध्यमलाई भने, ‘१६ साउनमा ममताले खाना पकाएर खुवाइन् ।’ तर, उनीहरूबीच संवाद नभएको नरेशको भनाइ थियो । तीन वर्षअघि विवाह भएको, श्रीमती सहयोगी भएको, तर सम्बन्ध अलिक औपचारिक रहेको उनको भनाइ थियो ।
- ३१ साउन मनासस पार्क प्रहरी डिपार्टमेन्टले विज्ञप्ति जारी गरी ममताको खोजीका लागि सहयोग गर्न सबैलाई आह्वान गर्यो । साथसाथै, प्रहरीले अनुसन्धान पनि जारी राख्यो । उसले भर्जिनिया तथा अमेरिकी अन्य राज्यमा पनि ममताको खोजीका लागि आह्वान गर्यो ।
- प्रहरीले ५ भदौमा उनीहरूको घर खानतलासी गर्यो । तर, नरेशलाई पक्राउ गर्न पर्याप्त प्रमाण प्रहरीले भेटेन । प्रहरीले १० सर्च वारेन्टहरू जारी गर्यो तथा सयौँसँग सोधपुछ गर्यो । अन्तिममा प्रहरीले नरेशलाई शंकास्पद अभियुक्तका रूपमा लियो । र थप अनुसन्धान अघि बढायो ।
- प्रहरीले ६ भदौमा नरेशलाई घरभित्रबाटै हतकडी लगाएर गिरफ्तार गर्यो । त्यही दिन एक वर्षीया छोरीलाई पनि संरक्षण केन्द्रमा लिएर गयो । प्रहरीले पहेँलो ओढ्नेले छोपेर ममताकी छोरीलाई घरबाट बाहिर निकालेको थियो ।
- सिएनएन र उसको सहयोगी डब्लुजेएलएले ७ भदौमा प्राप्त गरेको प्रमाणअनुसार नरेशले श्रीमती ममताको हत्या गरेको आशंका छ । घरभित्रै हत्या गरेर शव बाहिर निकालेको आशंका छ । यसका लागि प्रहरीले डिजिटल र फरेन्सिक जाँच गरेको थियो । नरेशलाई अर्को साता अदालतमा पेस गरिँदै छ ।
काभ्रेबाट बुबाको गुहार–छोरीको सास चाहियो, कि लास
काभ्रेको पनौती नगरपालिका– ६ नमोबुद्धस्थित सडकको छेवैमा कमल काफ्ले डेरी तथा चियापसल चलाउँछन् । उनी अमेरिकामा बेपत्ता ममता काफ्लेका बुबा हुन् । छोरी बेपत्ता भएको खबर सुनेपछि उनको होस अस्थिर छ, तर दैनिक गुजाराका लागि पसल खोलिरहेकै छन् ।
लामो प्रश्न गरेपछि मात्रै छोटो जवाफ दिने कमलको माग छ, ‘हामीलाई छोरीको सास चाहियो, कि लास चाहियो । हाम्री छोरी जीवित छिन् भने पनि चाहियो, छैनन् भने लास चाहियो । म सम्पूर्णमा यही अनुरोध गर्छु ।’
महाभारत गाउँपालिका– १ गोकुले स्थायी ठेगाना भएको काफ्ले परिवार पनौती आएको करिब ३० वर्ष भयो । दुई छोरा रहेका उनको छोरी ममता मात्रै हुन् । साइन्स विषयमा पनौतीबाटै ११ र १२ उत्तीर्ण ममताले भारतको बैंग्लोरबाट बिएस्सी नर्सिङ गरेकी हुन् । कमलका अनुसार भारतमा पढ्ने क्रममै कञ्चनपुरका नरेश भट्टसँग चिनजान भएको र पछि मागी विवाह भएको हो । ‘उनीहरूको चिनजान पहिला नै भएको रहेछ, पछि माग्न आएपछि ०७७ माघमा विवाह गरेर दियौँ,’ उनले भने ।
विवाहपछि करिब ६ महिना कञ्चनपुरकै घरमा बसेको र त्यसपछि चार वर्षअघि अमेरिका गएको कमलले बताए । उनका अनुसार ५ भदौ ०८० मा ममताले छोरी जन्माएकी थिइन् । ममता हराउनुभन्दा केही दिनअघिसम्म दिनमा एकपटक म्यासेन्जरमा कुराकानी हुने गरेको कमलले सुनाए । ‘सायद हामीलाई चिन्ता हुन्छ भनेर होला । जति नै यातना दिए पनि हामीबाट लुकाउँथिन्,’ कमलले भने, ‘अस्ति ३० तारिखका दिन भने अनुहार बेग्लै थियो । के भयो छोरी किन लुकाउँछौ भन्दा अलि हच्केकी थिइन् ।’
