दुई जनाको ज्यान जाेगाउने चणिकलाललाई प्रदेश सरकारले डेढ लाख नगदसहित सम्मान गर्ने

शनिबारको अविरल वर्षापछिको बाढीले ललितपुर महानगरपालिका २५ सुगम टोलस्थित नख्खु खोलामा बग्दै गरेका दुई जनाको ज्यान जोगाउने काभ्रेका चणिकलाल तामाङलाई बागमती प्रदेश सरकारले नगदसहित सम्मान गर्ने भएको छ ।बागमती प्रदेशका मुख्यमन्त्री बहादुर सिंह लामा तामाङले आफ्नो ज्यान जोखिममा पारेर पनि अरुको उद्धारमा खटिएका चणिकलाललाई प्रदेश सरकारका तर्फबाट नगद डेढ लाखसहित सम्मान गर्ने जानकारी दिए । उनले चणिकलालको साहासले बग्दै गरेका दुई जनाको ज्यान जोगिएको भन्दै प्रशंसासमेत गरे ।

मुख्यमन्त्री लामाले चणिकलाई टेलिफोनमार्फत् साहासिक कामका लागि धन्यावाद दिएको बताउँदै प्रदेश सरकारले नगदसहित सम्मान गर्न लागेको जानकारी गराएका छन्। काभ्रेको तेमाल गाउँपालिका वडा नम्बर ९ चोकटारका तामाङले गत शनिबार नख्खु खोलामा बग्दै गरेका रौतहट जिल्लाका राजु साहकी छोरी ६ वर्षीया मेघना साह र राजुका भाइ २२ वर्षीय राज साहको उद्दार गरेका थिए ।

‘विपद् प्रतिकार्यमा चणिकलालले खेलेको भुमिकाले नागरिक स्तरमा समाजसेवी भावना जागृत गरेको छ । उनको साहासिक कामले विपद् व्यवस्थापनमा आम नागरिकले कस्तो भुमिका खेल्न सक्छन् भन्ने उदाहरण र प्रेरणा मिलेको छ,’ मुख्यमन्त्री लामाले भने, ‘आगामी दिनमा विपद् प्रतिकार्यका लागि चणिकलाल जस्ता युवालाई प्रदेश सरकारले साथमा आवश्यक सहयोग र तालिमको व्यवस्था गर्छ ।’

प्रदेशका १३ वटै जिल्लामा विपद् व्यवस्थापन, उद्धार र राहतको कामलाई तिव्रता 
यसैबीच मुख्यमन्त्री लामाले विपद् व्यवस्थापन र बाढी, पहिरो प्रभावितको तत्कालिन उद्दार र राहत व्यवस्थापनका लागि प्रदेश सरकारले १३ वटै जिल्लामा आवश्यक जनशक्ति व्यवस्थापन गरेको बताएका छन्। विपद् प्रभावितको उपचारका लागि सबै जिल्लामा टोलि परिचालन गरिएको जानकारी गराउँदै उनले नि:शुल्क उपचारको व्यवस्था मिलाइएको जानकार दिए । यस्तै तत्काल राहत र अस्थायी बसोबासका लागि आवश्यक प्रवन्ध मिलाउँने काम भइरहेको मुख्यमन्त्री लामाको भनाइ छ ।

उनले संघीय सरकारसँगको समन्वय र स्थानीय सरकारसँगको सहकार्यमा पीडितलाई थप राहतको व्यवस्थापन गरिने पनि बताए । यसैगरी बाढी र पहिरोका कारण क्षति पुगेका राजमार्ग र ग्रामिण सडकहरुलाई दशै अघि नै सुचारु गर्नगरी काम सुरु भइसकेको पनि जानकारी दिए ।