सरकारको नेतृत्व गरेको दल एमालेले दसैँको सँघारमा तत्काल अवरुद्ध राजमार्ग र सडकहरू खुलाएर जनजीवन सहज बनाउन सरकारको गम्भीर ध्यानाकर्षण गराएको छ । तीन दिनको अविरल वर्षाले पुर्याएको ठूलो जनधनको क्षतिप्रति दुःख व्यक्त गर्दै एमाले केन्द्रीय कार्यालयको आइतबारको आकस्मिक बैठकले सरकारको गम्भीर ध्यानाकर्षण गराएको हो ।
‘नेपालीहरूको महान् चाड बडादसैँ नजिक आइरहेको छ । चाडपर्वको नजिक ठूलो प्राकृतिक विपत्तिको सामना गर्नुपरेको छ ।
पुल, सडक भत्किएका छन्, विद्युत् लाइन र खानेपानी अवरुद्ध भएका छन्,’ महासचिव शंकर पोखरेलले विज्ञप्तिमार्फत भनेका छन्, ‘यो अवस्थालाई मध्यनजर गरी अवरुद्ध सडकहरू खोल्न, मर्मत गर्न, नेपाललाई तिब्बतसँग जोड्ने अरनिको राजमार्गको लार्चाको पुल, बिपी राजमार्गको पुल, मदन भण्डारी राजमार्गको पुलहरूलगायतका देशका विभिन्न भागमा बाढीले बगाएको हुँदा पुलहरू पुनर्निर्माण गर्न, जनजीवनलाई सहज बनाउन नेपाल सरकारका सम्बन्धित निकायहरूको गम्भीर ध्यानाकर्षण गराउँदछौँ ।’