एनओसीले मान्यता नदिएको टेबुलटेनिसमा हमाल निर्विरोध

अखिल नेपाल टेबलटेनिस संघको चुनावी साधारणसभाले बृजेन्द्रबहादुर हमालको अध्यक्षतामा १२ सदस्यीय केन्द्रीय कार्यसमिति शनिबार निर्विरोध चयन गरेको छ । तर, यही कार्यसमितिलाई अन्तर्राष्ट्रिय मान्यता पाएको नेपाल ओलम्पिक कमिटीले स्वीकार गरेको छैन । लैनचौरस्थित राष्ट्रिय टेबुलटेनिस प्रशिक्षण केन्द्रमा भएको साधारणसभाको उद्घाटन राष्ट्रिय खेलकुद परिषद् (राखेप) सदस्यसचिव टंकलाल घिसिङले गरेका थिए । तर, निर्वाचन संघको स्वायत्तताको नीति र प्रक्रियाअनुसार नदेखिएको भन्दै एनओसीले आफ्नो प्रतिनिधि नै निर्वाचनमा पठाएन । 

यसअघि टेबल टेनिसका पूर्र्वअध्यक्ष तथा तदर्थ समितिका अध्यक्ष चतुरानन्द राजवैद्य, वरिष्ठ सहसंयोजक सुदिल शाहीसहित २३ बहुमत सदस्यले यथास्थितिमा साधारणसभा तथा निर्वाचत गर्न नसकिने भन्दै राखेपका सदस्यसचिवलाई हस्ताक्षरसहित पत्र लेखेका थिए । त्यसपछि एनओसीले आफ्नै उपाध्यक्ष राजवैद्यलाई साथ दिँदै प्रतिनिधि पठाएन । 

नयाँ कार्यसमितिको उपाध्यक्षमा गोवर्धन श्रेष्ठ, मनोहरकुमार पोखरेल र पूर्णशंकर श्रेष्ठ छन् । महासचिवमा कुवेरप्रकाश सिंह, सचिवमा प्रज्वलकान्त मैनाली र कोषाध्यक्षमा ज्याकी महर्जन रहे । शिवसुन्दर गोथे, नरबहादुर क्षेत्री, ऋषिराज लहरे, नवीनबहादुर सिंह र सन्तोषकुमार पौडेल सदस्यमा चयन भएका छन् । सदस्यसचिव घिसिङले नयाँ कार्यसमितिलाई चार वर्षका लागि ठोस कार्ययोजना बनाएर अघि बढ्न जोड दिएका छन् ।

पौडीले अझै अन्तर्राष्ट्रिय मान्यता पाएन
एनओसीको यो निर्णयसँगै टेबुलटेनिसको निर्वाचन विवादमा परेको छ । यो निर्वाचित कार्यसमितिलाई एनओसीले स्वीकार नगर्ने प्रस्ट छ । यसअघि पौडी संघको निर्वाचनबाट निर्वाचित जगतमान श्रेष्ठलाई पनि ओलम्पिक कमिटीले मान्यता दिएको छैन । राखेपले गराएको निर्वाचनबाट ४२ वर्ष पौडी संघमा रहेका अशोकरत्न बज्राचार्यले नाम फिर्ता लिएपछि श्रेष्ठ निर्विरोध निर्वाचित भएका थिए । यस निर्वाचनमा भने एनओसीले आफ्नो प्रतिनिधि पनि पठाएको थियो ।