टी–२० विश्वकपको छनोटबाट नेपाल बाहिरियो

आइसिसी टी–२० विश्वकप क्रिकेट प्रतियोतिगा खेल्ने नेपालको सपना अपुरै भएको छ । ओमानमा जारी आइसिसी टी–२० विश्वकप ग्लोबल क्रिकेट प्रतियोगिताको छनोटअन्तर्गत मंगलबार युएईसँग ६८ रनले पराजित भएसँगै नेपालको विश्वकप खेल्ने सपना अधुरो बनेको हो । नेपालले पहिलोपल्ट सन् २०१४ मा टी–२० विश्वकप खेलेको थियो ।  प्रतियोगिताको फाइनल पुग्ने दुई टोली अक्टोबर र नोभेम्बरमा अस्ट्रेलियामा हुने टी–२० विश्वकपमा सीधै पुग्ने प्रावधान थियो ।

ग्लोबल छनोटबाट युएई र आयरल्यान्ड विश्वकपमा पुगेका छन् । दुवै टोलीले फाइनल स्थान सुरक्षित गर्दै विश्वकपको टिकट काटेका हुन् । आयरल्यान्डले आयोजक ओमानमाथि सानदार जित निकाल्यो । समूह बीमा तीनवटै खेलमा सानदार प्रदर्शन गरेको नेपालले सेमिफाइनलमा समूह बीको उपविजेता युएईविरुद्ध ब्याटिङ, बलिङ र फिल्डिङमा कमजोर प्रदर्शन गरेको थियो । ओमानको अल अमेरात रंगशालामा मंगलबार युएईले पहिलो ब्याटिङ गर्दै सात विकेट गुमाएर एक सय ७५ रन बनाएको थियो ।

एक सय ७६ रनको लक्ष्य पछ्याएको नेपालले १८.४ ओभरमा सबै विकेट गुमाएर एक सय सात रन मात्र बनाउन सक्यो । यो नजितासँगै नेपालको विश्वकप खेल्ने सबै आशा समाप्त भयो । युएईसँग पराजित हुनुको पछाडि नेपाली ब्याट्सम्यानहरूको खराब ब्याटिङ प्रदर्शन नै थियो । लक्ष्य पछ्याएको इनिङ्सको पहिलो ओभरमै नेपालले दुई मुख्य ब्याट्सम्यान आउट भए । ओपनर आसिफ सेख र युवा ब्याट्सम्यान लोकेश बम शून्य रनमै आउट भए । दुवै ब्याट्सम्यानलाई जुनिद सिद्दिकीले इनिङ्सको चौथो र पाँचौँ बलमा आउट गरे । 

फितलो ब्याटिङ
सुरुवातै धरमराएको ब्याटिङमा कुशल भुर्तेल ३.४ ओभरमा पेभेलियन फर्केपछि नेपाल थप समस्यामा परेको थियो । कुशललाई जुनिदले नै पेभेलियन पठाए । फर्ममा रहेका दीपेन्द्रसिंह ऐरी आरिफ सेखले चौथो विकेटका लागि ३६ रनको साझेदारी गर्दै नेपाललाई ७.१ ओभरमा ५० रनको स्थितिमा राखे । आरिफ रोहन मुस्ताफाको ओभरमा ११ रनमा आउट भए । मध्यक्रममा ज्ञानेन्द्र मल्ल र दीपेन्द्रसिंहबीच गतिलो साझेदारी हुँदा नेपालको फाइनल पुग्ने आशा पलायो । पूर्वकप्तान मल्लले आफ्नो विकेट म्यानअफ दी म्याच अहमेद राजालाई दिए । 

चालू सिरिजमा पहिलोपटक गतिलो ब्याटिङ गरेका मल्लले १६ बल सामना गरी सामान एक चौका र छक्का प्रहार गरी २० रन बनाए । इनिङ्सको १२.५ ओभरमा दीपेन्द्रसिंह आउट भएपछि नेपालको सबै आशा समाप्त भयो । दीपेन्द्रले ३८ बलमा तीन चौका प्रहार गरी सर्वाधिक ३८ रन जोडे । राजाले लगातार दुई बलमा ज्ञानेन्द्र र दीपेन्द्रसिंहलाई आउट गरेपछि नेपाल ८३–६ को कमजोर स्थितिमा पुग्यो । त्यसपछि युएईले खेलमा पूर्ण पकड जमायो । पुछारका पाँच ब्याट्सम्यानले दोहोरो रन नै बनाउन नसक्दा नेपाल एक सय सात रनमै समेटियो । युएईको बलिङमा अहमेद राजा नायक भए । उनले चार ओभरमा १९ रन खर्चेर पाँच विकेट लिए । नेपाललाई सुरुवातमै समस्यामा परेका युएईका बलर जुनिद सिद्दीकीले घातक बलिङ गर्दै २७ रन खर्चेर तीन विकेट लिए । 

जितेन्द्र र अविनाशले दिए ८१ रन
समूह बीमा तीनवटै खेलमा सानदार जित हात पार्दा नेपालको बलिङ उत्कृष्ट थियो । ओमान, फिलिपिन्स तथा क्यानडालाई अलआउट पारेको नेपालले युएईविरुद्ध भने यही प्रदर्शन गर्न सकेन । नेपाली बलरले युएईविरुद्ध अन्यन्तै खराब प्रदर्शन गरे । जितेन्द्र मुखिया र अविनाश बोहराले समान तीन विकेटको प्रदर्शन गरे पनि दुवै बलर निकै खर्चिले देखिए । दुवै बलरले समग्रमा सात ओभरमा ८१ रन खर्चेका थिए । यसैगरी आरिफ सेखले दुई ओभरमा २० रन दिए । कप्तान सन्दीप लामिछाने, कमलसिंह ऐरी र दीपेन्द्रसिंह मात्र किफायती बलर देखिए । दीपेन्द्रसिंहले तीन ओभरमा १८ रन दिए । सन्दीपले २४ रन खर्चेर एक विकेट लिए । 

बलियो साझेदारी
अविनाशले १.४ ओभरमा फर्ममा रहेका ब्याट्सम्यान चिराग सुरीलाई चार रनमा आउट पार्दैै नेपाललाई उत्कृष्ट सुरुवात दिलाउन सफल भए । मुहमद वासिमले लगातार दुई विकेटका लागि बलियो साझेदारी गर्दै युएईलाई खेलमा फर्काए । वासिमले अरविन्दसँग दोस्रो विकेटका लागि ६६ रनको साझेदारी गरी टोलीलाई ७.३ ओभरमा ७२–२ को स्थितिमा राखे । सन्दीपको ओभरमा बोल्ड आउट हुनुअघि अरभिन्दले २३ बलमा तीन छक्का र पाँच चौकाको सहयोगमा ४६ रनको विस्फोटक इनिङ्स खेले । 

वासिमले मुहमद उस्मानसँग तेस्रो विकेटका लागि ६४ रनको अर्को उत्कृष्ट साझेदारी गरी युएईलाई १६.१ ओभरमा युएईलाई १३६–३ को बलियो स्थितिमा राखे । उस्मानले १७ रन जोडे । अभिनाशले एकै ओभरमा उस्मान र वासिमको विकेट लिँदै नेपाललाई खेलमा फर्काउने प्रयास गरे । वासिमले ४८ बलमा समान चार चौका र चार छक्का प्रहार गरी सर्वाधिक ७० रन बनाए । 

आयरल्यान्डसँग ओमान पराजित
मंगलबार नै भएको अर्को सेमिफाइनलमा आयरल्यान्डले ओमानलाई ५६ रनले हराउँदै विश्वकपका लागि छनोट भएको हो । पहिलो ब्याटिङ गरेको आयरल्यान्डले निर्धारित २० ओभरमा सात विकेट गुमाएर एक सय ६५ रन बनाएको थियो । आयरल्यान्डका लागि गेराथ डेलानीले ३२ बलमा ४७ रन जोडे । यसैगरी एन्डी म्याकव्रिनले २१ बलमा ३६ रन बनाए । मध्यक्रमका ह्यारी हेक्टरले ३५ रन बटुले । घरेलु टोली ओमान १८.३ ओभरमा एक सय नौ रनमा अलआउट भयो । ग्लोबल क्वालिफायरको फाइनलमा युएई र आयरल्यान्डले प्रतिस्पर्धा गर्नेछन् ।