रसुवागढीमा पक्की पुल निर्माण गर्न चीनलाई नेपालको सहमति, दुई वर्षमा तयार हुने

एक वर्षअघि बाढीले बगाएको रसुवागढीस्थित भोटेकोशीको सहायक नदी ल्हेन्दे खोलाको नेपाल–चीन मितेरी पुल चीन सरकारले दुई वर्षमा निर्माण गर्ने भएको छ । नेपालले पुल निर्माणका लागि औपचारिक सहमति दिएसँगै चीनले पुल निर्माणका लागि आवश्यक प्रक्रिया थालेको जानकारी नेपाललाई दिएको छ । गत वर्ष २४ असारको बाढीले मितेरी पुल बगाएपछि चीनले जडान गरेको बेलिब्रिजबाट दुई देशबिच आवतजावत भइरहेको छ । रसुवागढीमा पुल निर्माणका लागि डिजाइनलगायत सबै काम चीनले अघि बढाउनेछ । 

ल्हासास्थित नेपाली महावाणिज्यदूत लक्ष्मीप्रसाद निरौलाले पुल निर्माणको प्रक्रिया सुरु भएको जानकारी महावाणिज्य दूतावासलाई प्राप्त भएको बताए । ‘चीनले पक्की पुल निर्माणका लागि प्रस्ताव पठाएको थियो, नेपाल सरकारका तर्फबाट सहमति दिइएको छ । नेपालले प्रदान गरेको सहमतिको औपचारिक जानकारी चीनको तिब्बत (सिजाङ) स्वायत्त क्षेत्रका अधिकारीलाई हस्तान्तरण भइसकेको छ,’ उनले भने ।

बाढीपछि चीनले नेपाल–चीन सीमामा जडान गरेको बेलिब्रिजसँगै गत १७ पुसदेखि नेपाल र चीनबिच यात्रु तथा मालसामान बोकेका गाडीहरूको आवतजावत सुचारु भएको थियो । ‘बेलिब्रिजको आयु तीन वर्षको हुने रहेछ । चिनियाँ पक्षले अब दुई वर्षमा पक्की पुल तयार हुने जानकारी दिएको छ,’ निरौलाले भने ।

रसुवागढीमा गत वर्ष नाका अवरोध भएपछि मुस्ताङको कोरला नाका सुचारु भएको थियो । हाल पनि उक्त नाका सञ्चालनमा छ । अहिले बर्खा मौसमका कारण पहिरोलगायतका कारण नेपाल र चीनबिचका अन्तर्राष्ट्रिय नाका तातोपानी, रसुवागढी, हिल्सा पूर्ण रूपमा भने सुचारु हुने छैनन् ।