समाचार डिजिटल संस्करण

चैत १४ देखि १८ गतेसम्म काभ्रेमा विश्व युवा महोत्सव हुने

महोत्सवमा ७५ भन्दा बढी देशका १० हजार युवाले भाग लिने अनुमान

आगामी चैत १४ देखि १८ गतेसम्म धुलिखेलस्थित काठमाडौं विश्वविद्यालयमा विश्व युवा महोत्सव हुने भएको छ । जिल्ला समन्वय समिति काभ्रेको आयोजनामा नेपालमा पहिलोपटक विश्व युवा महोत्सव हुन लागेकाे हाे । महोत्सवमा विश्वभरका करिब १० हजार युवा प्रत्यक्ष सहभागी हुने आयोजकको अनुमान छ ।

जिल्ला समन्वय समिति काभ्रेले मंगलबार सञ्चारकर्मीहरूसँग अन्तर्क्रियाको आयोजना गरी सो कुराको जानकारी दिएको हो । जिल्ला समन्वय समिति काभ्रेका प्रमुख दीपककुमार गौतमका अनुसार महोत्सवका लागि हालसम्म ७५ देशबाट ७७८ जना सहभागीले अग्रिम नाम दर्ता गराइसकेका छन् । 

कार्यक्रमअगावै नाम दर्ता गर्नेलाई सात हजार पाँच सय र कार्यक्रम अवधिमा दर्ता गर्नेलाई १० हजार शुल्क तोकिएको उनले जानकारी दिए । गौतमको भनाइअनुसार दुई सयभन्दा बढी विज्ञ, वक्ता सहभागी हुने कार्यक्रममा २५ भन्दा बढी विषयमा कार्यपत्र प्रस्तुत हुनेछ ।

सरकारकोे भिजन २०२५, राष्ट्रिय योजना आयोगको १६औैँ पञ्चवर्षीय योजनाका साथै दिगो विकास लक्ष्यका सूचकहरू पूरा गर्न महोत्सव केन्द्रित हुने गौतमले जानकारी दिए ।

यस महोत्सवमा खेलकुद, सांस्कृतिक कन्सर्ट, सेमिनार, दृश्यावलोकनलगायतका ५० भन्दा बढी गतिविधि हुने गौतमले जानकारी दिए । उक्त महोत्सवमा तीन लाखभन्दा बढीले अवलोकन गर्ने अनुमान छ । महोत्सवमा विभिन्न विश्वविद्यालय, युवा सञ्जाल, अन्तर्राष्ट्रिय गैरसरकारी संस्थामा कार्यरत युवाहरू सहभागी हुनेछन् ।

महोत्सवमा सबै देशका युवा सवालका साथै कृषि, पर्यटन, स्वास्थ्य, शिक्षा, रोजगारी, संस्कृति, आयआर्जनलगायत विषयबारे कार्यपत्र, बहस, अन्तर्क्रिया र विज्ञसँग छलफल हुनेछ । महोत्सवको पूर्वसन्ध्यामा ‘ए’ डिभिजन फुटबल, फुटसल, महिला भलिबल र डिजिटल कविता प्रतियोगिता आयोजना गरिएको छ ।

जिल्ला समन्वय समिति काभ्रेले यसअघि १० हजारभन्दा बढीको सहभागितामा धुलिखेलमा लैंगिक हिंसाविरुद्धको अभियान, दुई हजारभन्दा बढी खेलाडी सहभागी गराएर खेलकुद महोत्सव र बृहत् काभ्रेपलाञ्चोक कृषि महोत्सव सम्पन्न गरिसकेको छ ।