- वि.सं २o८१ माघ ९ बुधबार
हिस्टोरिकल ब्लकबस्टर चलचित्र ‘पूर्णबहादुरको सारंगी’ फेम्ड निर्देशक सरोज पौडेलले निर्माण गर्न लागेको नयाँ चलचित्र ‘कोसेढुंगा’को मुख्य कलाकारको लाइनअप पूरा भएको छ। चलचित्रमा सुरक्षा पन्त र आर्यन सिक्देलसँगै नीति शाह र प्रवीण खतिवडा अनुबन्ध भइसकेका छन्।
थिम पोस्टरले पनि ‘कोसेढुंगा’मा महिला चरित्रले लिड गर्ने प्रस्ट संकेत गरिसकेको थियो। कोसेढुंगा ‘सोसल ड्रामा’ हो। अभाव, सपना र संघर्षको कथा चलचित्रले भन्ने संकेत थिम पोस्टरले गरेको छ।
‘सिनेमा कस्तो हुने, कथा के हो, कलाकार को–को हुने त्यो हामी केही समयपछि जानकारी गराउनेछौँ,’ निर्देशक पौडेलले भने, ‘तर, हामी यति भन्छौँ, पूर्णबहादुरको सारंगी जसरी दर्शकले मन पराउनुभयो त्यसैगरी मन जित्ने सिनेमा बनाउने प्रयासमा छौँ।’
सरोजले यसअघि निर्देशन गरेको ‘पूर्णबहादुरको सारंगी’ले नेपालमा मात्रै करिब ५० करोड ग्रस कलेक्सन गरिसकेको छ। ‘पूर्णबहादुरको सारंगी’का निर्देशकले निर्देशन गर्ने भएकाले ‘कोसेढुंगा’ प्रतीक्षित हुनेछ।
फागुन २ गतेदेखि छायांकन हुने चलचित्र ०८२ मा रिलिज हुने निर्माण पक्षले जानकारी दिएको छ। नरदेवी फिल्म्सको प्रस्तुति रहेको चलचित्रमा प्रेविल कँडेल र हरि महतको लगानी रहनेछ भने दिनेश खड्का कार्यकारी निर्माता रहेका छन्।
बाबु श्रेष्ठको डिओपी रहने चलचित्र सुरेन्द्र पौडेलले सम्पादन गर्नेछन्। चलचित्रमा संगीत रिदम कँडेल र आशिष अविरलको रहनेछ। कास्टिङ डिरेक्टर सुवलमणि सापकोटा रहनेछन्।
यो चलचित्रको छायांकनअगावै अन्तर्राष्ट्रिय प्रदर्शन अधिकार बिक्री भएको छ। अन्तर्राष्ट्रिय वितरण ‘सेभेन सिज इन्टरनेसनल’ कम्पनीले खरिद गरेको छ।
