समाचार डिजिटल संस्करण

अवैध भरुवा बन्दुकसहित एकजना पक्राउ

मकवानपुर प्रहरीले जिल्लाको मनहरी गाउँपालिबाट अवैध भरुवा बन्दुकसहित एकजनालाई पक्राउ गरेको छ।

पक्राउ पर्नेमा राक्सिराङ गाउँपालिका– १ गडुवानका ५२ वर्षीय जितबहादुर थिङ रहेको मकवानपुर प्रहरी प्रवक्ता डिएसपी श्यामु अर्यालले जानकारी दिए। उनका अनुसार मनहरी– ९ स्थित हरियाली सामुदायिक वनमा थिङलाई अवैध रूपमा भरुवा बन्दुक काँधमा बोकी हिँडिरेहेको अवस्थामा फेला पारी पक्राउ गरिएको हो ।

विशेष सूचनाको आधारमा इलाका प्रहरी कार्यालय मनहरीबाट खटिएको प्रहरी टोलीले थिङको साथबाट एक थान भरुवा बन्दुकसहित फलामको विभिन्न साइजको गोलाकार बेरिङ १३ थान, फलामको जस्तो देखिने विभिन्न साइजको लाम्चो आकारको वस्तु ३३ थान, बारुदजस्तो देखिने पाउडर ३०५ ग्राम, ढुंगाजस्तो देखिने वस्तु २४ थान र एक थान खुकुरी बरामद गरेको प्रवक्ता अर्यालले बताए।

पक्राउ परेका थिङलाई नियन्त्रणमा लिई हातहतियार तथा खरखजनासम्बन्धी कसुरमा थप अनुसन्धान भइरहेको अर्यालले जानकारी दिए।