- वि.सं २o८१ माघ ९ बुधबार
पहिलो संस्करणको नेपाल कबड्डी लिग (एनकेएल)मा काठमाडौं माभरिक्सले फराकिलोअन्तरले पराजित गरेको छ । राष्ट्रिय खेलकुद परिषद् (राखेप)को कभर्ड हलमा काठमाडौंले लिगमा दोस्रो जित निकाल्ने क्रममा हिमालयनलाई ५६–३४ को फराकिलो अन्तरले हराएको हो । यस खेलबाट काठमाडौंले महत्वपूर्ण पाँच अंक बटुलेको छ ।
चालू लिगमा काठमाडौंले हिमालयनविरुद्ध जोडेको ५६ अंक सर्वाधिक योगफल हो । यसअघि धनगढी वाइल्ड क्याट्समाथि विराटनगर ब्यान्डिट्सले ४६ स्कोर गरेको थियो । काठमाडौंले हिमालयनविरुद्ध एकपक्षीय खेल बनाएको थियो । काठमाडौंले हिमालयनलाई तीनपटक अलआउट गरेको थियो । पहिलो हाफमा काठमाडौं हिमालयनविरुद्ध ३६–१३ को फराकिलोअन्तर बनाउँदै जिततर्फ अग्रसर भएको थियो । काठमाडौंले ट्याकलबाट पहिलो हाफमा सर्वाधिक १८ अंक बनाएको थियो ।
हिमालयनले दोस्रो हाफमा सुधारिएको खेल प्रदर्शन गर्ने अपेक्षा थियो । तर, अनुभवी खेलाडी सम्मिलित काठमाडौंले हिमालयनलाई दोस्रो हाफमा खेलमा फर्कने मौका दिएन । जसका कारण हिमालयन दोस्रो हाफमा पनि निरीह भयो । काठमाडौंले चौथोपटक दोस्रो हाफमा हिमालयनलाई अलआउट गर्दै अंक बटुल्यो । हिमालयनले दोस्रो हाफमा काठमाडौंलाई एकपटक अलआउट गरेको थियो ।
काठमाडौंका रेहमान उत्कृष्ट
प्रतिस्पर्धामा काठमाडौंका मोहम्मद मिजानुर रेहमानले उत्कृष्ट खेल प्रदर्शन गरेका थिए । उनले काठमाडौंका लागि सर्वाधिक २१ अंक ल्याए । कोर्टमा सबैतिर छाएका मिजानुरले टचबाट १६, ट्याकलबाट तीन र बोनसबाट दुई अंक जोडेका थिए । काठमाडौंका कप्तान घनश्याम रोक्का मगरले टोलीलाई जित दिलाउन १८ अंकको योगदान दिए । हिमालयनसँगको प्रतिस्पर्धामा काठमाडौंले टचबाट सर्वाधिक २७ अंक जोडेको छ ।
यसैगरी, ट्याकलबाट १५, अलआउटबाट आठ अंक जोडेको काठमाडौंले बोनसबाट ६ अंक बटुल्यो । यसविपरीत हिमालयनले टचबाट १९, बोनसबाट १०, ट्याकलबाट ३ र अलआउटबाट दुई अंक हात पारेको थियो । काठमाडौंले लिगमा तीनमध्ये दुई खेलमा जित निकाली ११ अंक बनाएको छ । दोस्रो हार व्यहोरेको हिमालयनले पाँच अंक जोडेको छ ।
