बुल्गेरिया र रोमानियालाई सेन्जेनको पूर्ण सदस्यको मान्यता

युरोपेली संघ (इयू)का सदस्य राष्ट्रहरूले बुल्गेरिया र रोमानियालाई अर्को वर्षको सुरुदेखि सीमारहित सेन्जेन क्षेत्रको पूर्ण सदस्य बन्न स्वीकृति दिएका छन्। ‘बुल्गेरिया र रोमानियालाई स्वागत गर्न पाउनु ऐतिहासिक क्षण हो,’ हंगेरीका गृहमन्त्री स्यान्डर पिन्टरले भने।

सन् २००७ देखि युरोपेली संघका सदस्य रहेका यी दुई देशलाई मार्चमा आंशिक रूपमा स्वतन्त्र आवागमन क्षेत्रमा जोडिएको थियो, जसले सीमा जाँचविना हवाई र समुद्री यात्रा खुला गरेको थियो।

यद्यपि, अस्ट्रियाले आप्रवासनको चिन्तालाई लिएर आफ्नो मुलुकमा पूर्ण प्रवेशमा रोक लगाएको थियो। यसले गर्दा स्वतन्त्र रूपमा आवतजावतमा समस्या थियो।
भियनाले सोमबार इयूका मन्त्रीहरूको बिहीबारको बैठकमा आफ्नो भिटो प्रयोग नगर्ने घोषणा गर्‍यो, जसले २०२५ को जनवरी १ देखि दुवैलाई पूर्ण सदस्य बन्ने मार्गप्रशस्त गरेको छ।

बुखारेस्ट र सोफिया (क्रमशः रोमानिया र बुल्गेरियाका राजधानी)ले सन् २०१० मा ब्रसेल्सले तोकेका सबै प्राविधिक मापदण्ड पूरा गरेका थिए। तर, विभिन्न सदस्य राष्ट्रहरूले उनीहरूको प्रवेशमा अवरोध गरेपछि सेन्जेन क्षेत्रमा सामेल हुन एक दशकभन्दा बढी समय पर्खिनुपरेको थियो।

सन् २०२२ देखि अस्ट्रियाले उनीहरूको आवेदन रोकेको थियो, जसले वर्षौंदेखि असुरक्षित बाह्य सेन्जेन सीमाहरूको परिणामस्वरूप कागजातविहीन आप्रवासीहरूको असमान संख्याको होस्टिङको बारेमा गुनासो गर्दै आएको थियो। बुडापेस्टमा तीन देशले ‘सीमा सुरक्षा प्याकेज’ सम्झौतामा हस्ताक्षर गरेपछि अस्ट्रियाले आफ्नो आपत्ति फिर्ता लिएको छ।

सम्झौतामा बुल्गेरियाली–टर्की सीमामा संयुक्त रूपमा सीमा रक्षकको तैनाथी र स्थलमार्गमा अस्थायी सीमा नियन्त्रणको प्रारम्भिक अवधि ६ महिनाको लागि हुने अस्ट्रियाका गृहमन्त्री गेरहार्ड कार्नरले बताएका छन्। 

सन् १९८५ मा स्थापना भएको सेन्जेन जोनमा हाल २९ सदस्य छन्, जसमा युरोपेली संघका २७ सदस्य राष्ट्रमध्ये २५ का साथै स्विट्जरल्यान्ड, नर्वे, आइसल्यान्ड र लिचेन्स्टाइन रहेका छन्।

यो आन्तरिक सीमा नियन्त्रणविना विश्वको सबैभन्दा ठुलो क्षेत्र हो, जहाँ ४० करोडभन्दा बढी मानिस स्वतन्त्र रूपमा यात्रा गर्न सक्छन्।