कैलालीको धनगढीबाट प्रहरीले करिब एक लाख मूल्य बराबरको पटाकासहित एकजनालाई पक्राउ गरेको छ । धनगढी उपमहानगरपालिका–८, धनगढीबाट स्थानीय मीनबहादुर बुच्चामगरलाई एक लाख चार हजार मूल्यका पटाकासहित पक्राउ गरिएको जिल्ला प्रहरी कार्यालयले जनाएको छ ।
मगरले चलाएको सु.प.प्र ०१–००१ ज १४८२ नम्बरको कारलाई शंकाको आधारमा चेकजाँच गर्दा कारभित्र तीन कट्टा पटाका बरामद गरिएको जिल्ला प्रहरी कार्यालयका सहप्रवक्ता प्रहरी निरीक्षक दर्शन खड्काले बताए ।
उनीविरुद्ध विस्फोटक पदार्थ ऐनअनुसार कारबाही अगाडि बढाइएको प्रहरीले जनाएको छ । नजिकिदै गरेको तिहारलाई मध्यनजर गर्दै स्थानीय प्रशासनले पटाकाको कारोबार तथा प्रयोगको प्रतिबन्धमा कडाइ गरेको छ तर खुला सीमानाका कारण भारतबाट अवैधरुपमा हुने पटाका आयात रोक्न भने चुनौति छ ।