सभामुखले एमाले सांसद योगेश भट्टराईको शब्द रेकर्डबाट हटाउन नपर्ने रुलिङ गरेपछि माओवादी केन्द्रका सांसदहरूले बुधबारको प्रतिनिधिसभा बैठकमा अवरोध गरेका छन्।
माओवादीको निरन्तर अवरोधपछि सभामुख देवराज घिमिरेले कार्यसूचीमा रहेका सबै कार्यक्रम हटाउँदै बैठक स्थगित गरेका छन्।
भदौ १२ गते प्रतिनिधिसभाको बैठकमा एमाले सांसद भट्टराईले माओवादीको सशस्त्र संघर्षलाई ‘हिंसा’ भनेकोमा माओवादी सांसदहरूले आपत्ति जनाउँदै रेकर्डबाट हटाउन माग गरेका थिए।
तर, सभामुखले विषय, प्रसंग र प्रस्तुतिअनुसार भट्टराईको शब्द असंसदीय नदेखिएको भन्दै रेकर्डबाट हटाउन नपर्ने रुलिङ गरेपछि माओवादीले संसद् अघि बढ्न दिएन। अवरोधबिच सभामुखले भदौ ३० गते आइतबार दिउँसो १ बजेसम्मका लागि बैठक स्थगित गरेका हुन्।