- वि.सं २o८१ भदौ २० बिहीबार
सुदूरपश्चिमकी कविता भट्टले अहिलेसम्म तीन अन्तर्राष्ट्रिय भलिबल प्रतियोगितामा सहभागिता जनाएकी छिन् । भट्टले काभा महिला भलिबल नेसन्स लिगको पहिलो र दोस्रो संस्करणसँगै एसियन कप र रुसस“गको एक मैत्रीपूर्ण खेल खेलेकी छिन् । नेपालले काभा नेसन्सको पहिलो दुई उपाधि जित्दा उनी महत्वपूर्ण खेलाडी थिइन् ।
भट्ट अहिले नेपाल खेलकुद पत्रकार मञ्च (एनएसजेएफ)को पिपुल्स च्वाइस अवार्डमा मनोनीत छिन् ।
उनी यो अवार्डको दाबेदार खेलाडी हुन् । एनएसजेएफले वितरण गर्ने अवार्डको २१औँ संस्करण आइपुग्दा अहिलेसम्म भलिबलले ६ पटक पिपुल्स च्वाइस अवार्ड जितेको छ । भलिबलको साख जोगाउने जिम्मेवारी आफूमा आएको उनले बताएकी छिन् । विभागीय टोली एपिएफका लागि पनि यो अवार्डलाई जित्ने लक्ष्यमा छन् ।
यसअघि एपिएफकै दुई खेलाडीले यो अवार्ड जितिसकेका छन् । ‘भलिबलको साख जोगाउने जिम्मेवारी आएको छ । भलिबलले नै ६ पटक यो अवार्ड जितेको हुँदा मेरोस“गै भलिबल, भलिबलप्रेमी र मेरो क्लब एपिएफका लागि यो अवार्ड जित्नैपर्ने दबाब छ,’ उनले भनिन् ।
भलिबलमा फरक पहिचान
भट्ट अहिले विभागी टोली एपिएफमा छिन् । वर्ष ०७४ मा एपिएफमा आएकी उनले नेपाली घरेलु महिला भलिबलमा आफ्नो बेग्लै पहिचान बनाउन सफल भइन् । एपिएफको महिला भलिबल टोलीले सातौँदेखि नवौँ राष्ट्रिय खेलकुदमा स्वर्ण जित्दा उनी टोलीकी सदस्य थिइन् ।
एनभिए कप, टाइगर कप, ढोरपाटन भलिबल च्याम्पियनसिपलगायत धेरै प्रतियोगिता एपिएफले जित्दा उनले महत्वपूर्ण भूमिका खेलेकी थिइन् । नेपाली भलिबलमा अगाडि बढिरहेकी भट्टले ०७३ मा पहिलोपटक भलिबल छोएकी थिइन् ।
त्यसवेला उनलाई कोर्ट र खेलबारे केही जानकारी थिएन । अग्लो कदले गर्दा उनको भलिबल यात्रा सुरु भयो । र, नेपाली राष्ट्रिय महिल भलिबल टोलीकी उनी मुख्य सदस्य बनेकी छिन् ।
