- वि.सं २o८१ भदौ ९ आइतबार
ताप्लेजुङमा जारी ताप्लेजुङ गोल्डकपमा टिकट बिक्रीबाट साढे १३ लाख रुपैयाँभन्दा बढी रकम संकलन भएको छ। फाइनलअघिका खेलहरूमा आयोजक लाखेजात्रा सञ्चालन समितिले प्रवेश शुल्कबाट १३ लाख ६२ हजार ६ सय रुपैयाँ संकलन गरेको हो।
जिल्लाको ब्रान्ड जस्तै बनेको लाखेजात्राको अवसरमा खेलाइने ‘ताप्लेजुङ गोल्डकप’का क्वार्टर फाइनलका चार र सेमिफाइनलका दुई गरी ६ खेलका टिकट बिक्रीबाट सो रकम संकलन भएको लाखेजात्रा सञ्चालन समितिका कोषाध्यक्ष निरोज श्रेष्ठले जानकारी दिए।
श्रेष्ठका अनुसार क्वार्टर फाइनलका चार खेलबाट सात लाख नाै हजार आठ सय रुपैयाँ र सेमिफाइनलका दुई खेलबाट ६ लाख ५२ हजार आठ सय रुपैयाँ संकलन भएको छ। सेमिफाइनलका दुई खेलमध्ये पहिलो खेलबाट तीन लाख आठ हजारआठ सय र दोस्रो खेलबाट तीन लाख ४४ हजार रुपैयाँ संकलन भएको उनले बताए।
लाखेजात्रा सञ्चालन समितिले क्वाटर फाइनलका चार खेलका लागि जनही एक सय, सेमिफायनलका दुई खेलका लागि दुई सय र फाइनल खेलका लागि जनही दुई सय पचास रुपैयाँ प्रवेश शुल्क निर्धारण गरेको छ। सोमबार हुने फाइनल खेलमा करिब आठ लाख रुपैयाँ उठ्ने अपेक्षा गरिएको समितिका सचिव टिकेन्द्र नेपालीले बताए।
