नेपाली कांग्रेसको १४औँ महाधिवेशनमा केन्द्रीय सदस्यका लागि जुम्लाका दुई महिला नेतृले उम्मेदवारी घोषणा गरेका छन्। चन्दननाथ नगरपालिकाकी मेयर कान्तिका सेजुवाल र युवा नेतृ एवं नेपाल निमार्ण व्यवसायी महासंघकी केन्द्रीय सदस्य रामदेवी खड्काले केन्द्रीय सदस्यमा उम्मेदवारी घोषणा गरेका हुन्।
सेजुवालले नेपाली कांग्रेसको केन्द्रीय सदस्यमा संस्थापन (देउवा) पक्षबाट उम्मेदवार घोषणा गरेकी हुन्। कांग्रेस जुम्लाका तत्कालीन सभापति मानव सेजुवालको हवाईजहाज दुर्घटनामा परी मृत्यु भएपछि उनकी पत्नी कान्तिका सेजुवाल कांग्रेस जुम्लाको राजनीतिमा सक्रिय छिन्। स्नातकोत्तरसम्मको अध्ययन गरेकी सेजुवाल शिक्षक पेसाबाट राजीनामा दिएर राजनीतिमा होमिएकी हुन्।
केन्द्रीय सदस्य खड्काले संस्थापनइतर (पौडेल)पक्षबाट उम्मेदवारी घोषणा गरेकी हुन् । खड्काले पार्टी नेतृत्वमा युवाको उपस्थिति र भूमिका, एक व्यक्ति एक पदका बारेमा पार्टी र सरकारको नेतृत्वमा युवा महिलाको उपस्थिति, जिम्मेवारी प्रदानका विषयमा असल र सफल नेतृत्व निर्माणजस्ता विषयमा सशक्त भूमिका रहने बताएकी छिन्। उनी ०७४ सालको निर्वाचनमा कांग्रेसको समानुपातिक सांसदको बन्द सूचीमा परेकी थिइन्।
