धनकुटा- धनकुटाको पाख्रीबासबाट जुवा खेलिरहेको अवस्थामा आज बिहान कौडा र नगद सहित ७ जनालाई प्रहरीले पक्राउ गरेको छ ।
पाख्रीबास नगरपालिका–९ लिस्म्बुस्थित विष्णु घिसिङको घरमा जुवातास खेलिरहेको भन्ने गोप्य सुचनाको आधारमा प्रहरी नायब निरीक्षक गणेश दाहालको कमाण्डमा प्रहरी टोली खटिएको थियो । सो टोलीले जुवा खेलिरहेको अवस्थामा बिहान २:३० बजे ७ जनालाई नियन्त्रणमा लिएको जिल्ला प्रहरी कार्यालय धनकुटाले जनाएको छ ।
प्रहरीले घटनास्थलबाट ठुलो कौडा १४ वटा, सानो कौडा १६ वटा र खालबाट नगद ४ हजार बरामद गरेको छ भने उनीहरूको साथबाट नगद १ लाख ७ हजार ३ सय १५ रुपैयाँ बरामद गरेको प्रहरीले जनाएको छ ।
जुवाको खालबाट पक्राउ पर्नेमा पाख्रीबास नगरपालिका–९ का ५५ वर्षीय विष्णु घिसिङ, ३४ वर्षीय अरुण घिसिङ, ३९ वर्षीय रमेश घिसिङ, ३४ वर्षीय लिलबहादुर मगर, ४४ वर्षीय लक्ष्मीकुमार मगर, २६ वर्षीय जसमान तामाङ र ४८ वर्षीय बीरबहादुर घिसिङ रहेका छन् । पक्राउ परेकाहरुलाई जिल्ला प्रहरी कार्यालय धनकुटा ल्याइएको छ ।
उनीहरु विरुद्ध ‘जुवा खेल्न तथा सट्टेबाजी गर्न नहुने’ मुद्दा दर्ता गरिने जिल्ला प्रहरी कार्यालय धनकुटाका सुचना अधिकारी डिएसपी हेमन्त थापा क्षेत्रीले बताए ।
गत कात्तिक १२ गते पनि पाख्रीवास बजारबाट कौडा सहित ११ जनालाई प्रहरीले पक्राउ गरेको थियो । चाडवाड शुरु भएसँगै धनकुटा प्रहरीले चुवातास नियन्त्रणमा सक्रियता देखाउँदै आएको छ ।
