दोलखा जिल्लास्थित ‘च्छो रोल्पा ताल’ विदेशी तथा स्वदेशी पर्यटकको रोजाइमा पर्ने गन्तव्य हो । हिमाली क्षेत्र भएकाले यहाँ ट्रेकिङ गर्नुको मज्जा बेग्लै छ । गौरीशंकरसहितका मनमोहक हिमशृंखला, विभिन्न हिमाली वन्यजन्तु, चरा तथा वनस्पतिहरू यात्राका क्रममा नियाल्न पाइन्छ । यात्रामा जाँदा औषधि, आवश्यक खानेकुरा तथा कपडाहरू बोक्नुपर्ने हुन्छ ।
पहिलो दिन : काठमाडौं–चरिकोट (दोलखाको सदरमुकाम) हुँदै सिमी गाउँ पुगिन्छ । कतिपय चरिकोटमै वास बस्ने गरेका छन् । तर, धेरैजसो पर्यटक काठमाडौंबाट हिँडेकै दिन सिमी गाउँ पुग्छन् । र, त्यस दिन सिमी गाउँमै रात बिताउने गर्छन् ।
दोस्रो दिन : दोस्रो दिन सिमी गाउँदेखि ग्याल्चे गाउँ पुग्न सकिन्छ । सुमुर्चेबाट करिब दुई घन्टा हिँडेपछि ग्याल्चेमा पुगिन्छ । उकालो र तेर्साे बाटो हुँदै सुर्मुचेमा पुगिन्छ । यहाँ खाना, खाजा र वासको राम्रो व्यवस्था छ । खुला ठाउँमा भएकाले चारैतिर दृश्यावलोकन गर्न सकिन्छ । छ्योतछ्योत छाँगोपछि झोलुंगे पुल तरेर सिमी गाउँ आउँछ । सिमी गाउँसम्म फराकिलो र व्यवस्थित पैदल मार्ग छ । सिमी गाउँ पुग्नलाई ठाडै उकालो हिँड्नुपर्छ ।
तेस्रो दिन : तेस्रो दिन ग्याल्चेबाट खाना खाएपछि यात्रा सुरु हुन्छ । यस दिन चिम्मु गाउँमा पुगेर वास बस्न सकिन्छ । चिम्मुको उचाइ तीन हजार ६ सय ७२ मिटर छ ।
चौथो दिन : चिम्मुबाट वेदिङ हुँदै ना गाउँ पुग्न सकिन्छ । ना गाउँ चार हजार एक सय १४ मिटर उचाइमा छ ।
पाँचौँ दिन : पाँचोैँ दिन हामी ना गाउँबाट हिँड्दै च्छो रोल्पा ताल पुग्न सक्छौँ । यसका लागि हामीले बिहान सबेरै यात्रा थाल्नुपर्ने हुन्छ । चार हजार पाँच सय ५१ मिटर उचाइमा रहेको च्छो रोल्पा ताल पुग्न ना गाउँबाट निरन्तर उकालो लाग्नुपर्छ । बाटोमा फोटो कैद गर्दै हिँड्यो भने च्छो रोल्पा पुग्न ढिला पनि हुन सक्छ । च्छो रोल्पा निकै मनमोहक छ । यहाँको सुन्दरता अवलोकन गर्नेहरू फेरि–फेरि यही ठाउँ घुम्न रुचाउँछन् । दिउँसो च्छो रोल्पा घुमे पनि राति वास बस्नलाई फेरि ना गाउँ नै फर्कनुपर्ने हुन्छ ।
छैटौँ दिन : यसपछि प्रायः पर्यटकहरू ना गाउँबाट ग्याल्चे फर्कने गर्छन् ।
सातौँ दिन : सातौँ दिन हिँड्दै चेटचेट फर्कन सकिन्छ र यही दिन त्यहाँबाट गाडीमा चरिकोट आउन सकिन्छ ।
आठौँ दिन : चरिकोटबाट गाडीमा तपाईं सहजै आठौँ दिन काठमाडौं आइपुग्न सक्नुहुन्छ । तपाईंको हिँडाइको गतिका आधारमा यो यात्रा सोचेभन्दा छोटो वा लामो पनि हुन सक्छ ।