एक करोडभन्दा धेरै बिमा गरिएको व्यक्तिको लगत्तै मृत्यु भई भुक्तानी भएका फाइलमाथि सिआइबीले छानबिन गर्दै

बिमा रकमकै लागि हत्याका घटना हुन थालेपछि प्रहरीले ठूला जीवन बिमाको भुक्तानीमाथि छानबिन थालेको छ । बिमा रकम हत्याउनकै लागि नक्कली विवाह गराउनेदेखि दुर्घटनाका नाममा हत्या गर्नेसम्मको अपराध भएको खुलेपछि प्रहरीले यस्ता घटना थप हुन सक्ने आशंकामा विस्तृत छानबिन थालेको हो । 

बिमा रकमकै लागि बाँके कोहलपुरका सर्जन विकको गत वर्ष हत्या गरिएको थियो । बसको ठक्करबाट हत्या गरी दुर्घटना भएको देखाएर उनको बिमाबापतको साढे दुई करोड निकालिएको थियो । बिमा गरेको एक महिनामै हत्या भएको घटनामा प्रहरीको केन्द्रीय अनुसन्धान ब्युरो (सिआइबी)ले ६ जनालाई पक्राउ गरी अनुसन्धान गरिरहेको छ । 

‘यस्ता अन्य घटना पनि भएका हुन सक्छन् कि भन्ने आधारमा हामीले विस्तृत छानबिन थालेका छौँ,’ सिआइबीका निर्देशक एआइजी उत्तमराज सुवेदीले भने, ‘शंकास्पद किसिमका फाइलको अध्ययन भइरहेको छ ।’ एक करोडभन्दा धेरै बिमा गरिएको व्यक्तिको लगत्तै मृत्यु भई भुक्तानी भएका फाइलमाथि सिआइबीले छानबिन थालेको हो । 

कमजोर आर्थिक अवस्था भएका सर्जनको स्थानीय सपना मल्लसँग विवाह दर्ता गरी उनको योजनाबद्ध हत्या भएको थियो । बिमा रकम मल्लको नाममा ल्याउन नक्कली बिहे गरिएको थियो । कोहलपुरकै सञ्जीव अर्यालको योजनामा यस्तो जघन्य अपराध भएको थियो । सञ्जीव र सपनासहित सिआइबीले घटनामा सहयोग गर्ने सरदार अहमद खाँ, टोपबहादुर राना क्षेत्री, दीपक केसी र ललिता सापकोटालाई पक्राउ गरी अनुसन्धान गरिरहेको छ । बिमाको रकम उनीहरूले बाँडीचुँडी लिएका थिए । उनीहरूमाथि ठगीका साथै संगठित अपराध मुद्दामा पनि अनुसन्धान अघि बढाइएको सिआइबीका एसपी श्यामकुमार महतोले बताए । 

उनीहरूले २८ फागुन ०७७ मा रिलायन्स लाइफ इन्स्योरेन्समा सर्जनको जीवन बिमा र म्यादी जीवन बिमा गरेका थिए । त्यसको पाँच दिनपछि उनको सपना मल्लसँग विवाह दर्ता गरिएको थियो । विवाह दर्ता भएको ठीक एक महिनामा उनको हत्या भएको थियो । चार महिनापछि कम्पनीले दुई करोड ५० लाख रुपैयाँ सपनालाई भुक्तानी गरेको थियो । 

यो घटनामा बिमा कम्पनीको समेत भूमिका शंकास्पद देखिएको छ । सामान्य मजदुरी गर्ने सर्जनको साढे दुई करोड रुपैयाँको बिमा नै नियमविपरीत थियो । वार्षिक आयको अधिकतम ४० प्रतिशतसम्म मात्र बिमा गर्न सकिन्छ । सर्जनले वार्षिक दुई लाख आय रहेको भनेर फर्म भरेका थिए । तर, पहिलो बिमा शुल्क नै पाँच लाख ४० हजार रुपैयाँ तिरिएको थियो । त्यसैले रिलायन्स लाइफ इन्स्योरेन्स कोहलपुर शाखाका कर्मचारी पनि छानबिनमा छन् । 

अझ भुक्तानीको समयमा पनि विस्तृत छानबिन भएन । कम्पनीले बिमा समितिका अध्यक्ष सूर्य सिलवालको हातबाट सपना मल्ललाई साढे दुई करोड भुक्तानी गराएको थियो । पछि नेपाल पुनर्बिमा कम्पनीका कर्मचारीले फाइल हेर्दा शंका लागेपछि छानबिन सुरु भयो र एक वर्षपछि वास्तविकता बाहिर आएको हो । 

 प्रहरी अनुसन्धानले जोगियो थप दुईजनाको ज्यान
प्रहरी स्रोतका अनुसार सञ्जीवले थप दुई व्यक्तिको विवाह दर्ता गरी बिमा गराउने प्रक्रिया अघि बढाइसकेका थिए । बिमा गराएपछि दुर्घटनाको नाममा हत्या गर्ने योजना बनिसकेको खुलेको छ । त्यसरी विवाह दर्ता गरेका दुई व्यक्ति सिआइबीको सम्पर्कमा पुगिसकेका छन् । प्रहरीले ठगीका साथै ज्यान मुद्दामा पनि छुट्टै छानबिन गरिरहेको छ । त्यतिवेला सामान्य दुर्घटनाका रूपमा मात्र अनुसन्धान भएको थियो । हत्याको योजनाले ठक्कर दिने बसचालक टोपबहादुर राना क्षेत्रीलाई ३० दिन मात्र कैद सजाय भएको थियो । जब कि यस्तो अपराधमा जन्मकैद सजायको व्यवस्था छ । घटनाका योजनाकार जोगिएकाले उनीहरूलाई कर्तव्य ज्यान मुद्दामा पनि अनुसन्धान हुन लागेको हो ।

बिमाका लागि श्रीमती र छोरीको हत्या 
बिमा रकमकै लागि यसअघि परिवारकै सदस्यको हत्या भएका घटना पनि छन् । १७ असार ०७६ मा रौतहटको मौलापुर नगरपालिका– ६ पथराबुधरामका ३९ वर्षीय रामकिशोर यादवले बिमा गरेको एक महिना नपुग्दै चार वर्षीया छोरी लक्ष्मीको हत्या गरेका थिए । बिमा रकमकै लागि उनले हत्या गरेको प्रहरी अनुसन्धानमा खुलेको थियो । रामकिशोरले प्रभु लाइफ इन्स्योरेन्स कम्पनीमा १९ जेठ ०७६ मा छोरीको नाममा २५ लाखको जीवन बिमा गराएका थिए । त्यसको २९औँ दिनमा घाँटी थिचेर हत्या गरी पोखरीमा शव फालेका थिए । डुबेर मृत्यु भएको देखाउन उनले शव पोखरीमा फालेका थिए ।