- वि.सं २o७९ जेठ ४ बुधबार
नेपाली कांग्रेस र नेकपा (एकीकृत समाजवादी) को गठबन्धनलाई पराजित गर्दै नेकपा एमालेले अछामको मंगलसेन नगरपालिकामा मेयर र उपमेयर दुवै पदमा जित हात पारेको छ । पालिकामा मेयर पदमा एमालेका उम्मेदवार पदमबहादुर बोहरा पाँच हजार ७३७ मत र उपमेयरमा संगीता रावल (सोडारी) पाँच हजार ७१९ मत ल्याएर विजयी भएका हुन् । प्रतिद्वन्द्वी गठबन्धनका तर्फबाट कांग्रेसका नमबहादुर शाहीले पाँच हजार २ मत पाए भने गठबन्धनकै तर्फबाट उपमेयरमा बमबहादुर रावलले तीन हजार ७५ मत मात्र प्राप्त गरे ।
मेयरमा विजयी भएका बोहरा यसअघि पनि मंगलसेनका मेयर थिए । ०७४ सालको स्थानीय तह निर्वाचनमा कांग्रेस–माओवादी गठबन्धनलाई पराजित गर्दै उनी निर्वाचित भएका थिए । त्यो वेला बोहराले जम्मा चार हजार ६९१ मत ल्याएका थिए भने उपमेयर सरिता उपाध्यायले चार हजार ९११ मत ल्याएकी थिइन् । १४ वडा रहेको मंगलसेनमा ०७४ मा एमालेले जम्मा ५ वडा मात्रै जितेको थियो भने अन्य ९ वटा वडामा कांग्रेसका वडाध्यक्ष विजयी भएका थिए । तर योपटक भने एमालेले मत संख्या र वडाहरूको नतिजा उल्ट्याइदिएको छ । अहिले एमालेले १० वडा जित्यो भने कांग्रेस ४ वडामा सीमित भएको छ ।
बोहराको वडामा भने एमाले पराजित
मंगलसेनको मेयरमा फराकिलो मतान्तरले विजयी भएका पदमबहादुर बोहराको वडामा भने एमालेले हार ब्यहोर्नुपरेको छ । त्यहाँ कांग्रेसका तर्फबाट नामसिंह धामी वडाध्यक्ष बनेका छन् । वडा नम्बर ४ यसअघि सधैँ एमालेले जित्ने गरेको थियो । यो वडामा बहुदल यता कांग्रेसले जितेको यो पहिलोपटक हो ।
वडाध्यक्षमा विजयी धामीले मेयर बोहराको वडामा एमालेका उम्मेदवारलाई २६ मतान्तरले पराजित गरेका हुन् । उनले ४ सय ९९ मत प्राप्त गरे भने एमालेका उम्मेदवार केवलसिंह धामीले ४ सय ७५ मत प्राप्त गरे ।
