- वि.सं २o७८ बैशाख १७ शुक्रबार
नेत्रविक्रम चन्द विप्लव समूहका केन्द्रीय सदस्य माइला लामा संखुवासभा कारागारबाट धरौटीमा छुटेका छन् । विप्लव समूहका नेपाल कम्युनिस्ट पार्टीका केन्द्रीय सदस्य तथा उपत्यका इन्चार्जसमेत रहेका माइला लामा धरौटी रकम बुझाएपछि बिहीबार रिहा भएको संखुवासभाका कारागाार प्रमुख विनोद अधिकारीले बताए । उनका अनुसार लामा २५ हजार रुपैयाँ धरौटी रकम बुझाएर कारागारबाट छुटेका हुन् ।
कारागारबाट रिहाइ भएका लामा शुक्रबार काठमाडौं गएका छन् । सरकार र विप्लव नेतृत्वको पार्टीबीच गत फागुन २१ गते भएको सहमतिको दुई महिनापछि लामा रिहा भएका हुन् । यसअघि गृह मन्त्रालयले विप्लव कार्यकर्ता रिहा गर्न सर्कुलर गरे पनि उनीहरू छुटेका थिएनन् ।
लामालाई ०७६ साउन ५ मा काठमाडौंबाट पक्राउ गरेर संखुवासभा कारागार ल्याइएको थियो । संखुवासभा कारागारमा विप्लव कार्यकर्ताहरू लामासहित अन्य आठजना रहेका छन् । कारागारमा रहेका संखुवासभा इन्चार्ज देव गुरुङ, जिल्ला सदस्य सुनिता राईलगायतका कार्यकर्ताहरू भने अझै रिहा भएका छैनन् ।
