क्यानडाले अमेरिकामाथि जवाफी भन्सार महसुल लगाउने

क्यानडाका प्रधानमन्त्री जस्टिन ट्रुडोले केही अमेरिकी वस्तुमा २५ प्रतिशत भन्सार महसुल लगाएर अमेरिकी भन्सार महसुलको जवाफ दिने बताएका छन्।

दीर्घकालीन क्यानडा–अमेरिका सम्बन्धमा विभाजनको चेतावनी दिँदै उनले भने, ‘क्यानडाले एक खर्ब ५५ अर्ब क्यानेडियन डलर (एक खर्ब ६ अर्ब अमेरिकी डलर) मूल्यबराबरका अमेरिकी वस्तुहरूमा २५ प्रतिशत भन्सार महसुल लगाएर अमेरिकी व्यापार कारबाहीको जवाफ दिनेछ।’

पहिलो चरणमा मंगलबार ३० अर्ब क्यानेडियन डलर मूल्यबराबरका अमेरिकी वस्तुहरूमा भन्सार महसुल लगाइने र तीन हप्तामा थप एक खर्ब २५ अर्ब क्यानेडियन डलर मूल्यबराबरका उत्पादनहरूमा थप भन्सार महसुल लगाइनेछ।

‘हामी निश्चित रूपमा तनाव बढाउन खोजिरहेका छैनौँ, तर हामी क्यानडा, क्यानाडालीहरू र क्यानाडाली रोजगारीका लागि उभिनेछौँ,’ ट्रुडोले भने, ‘अझै धेरै, धेरै कुरासहित अमेरिकी बियर, वाइन र बर्बनका साथै फलफूल, तरकारी, उपभोक्ता उपकरण, काठ र प्लास्टिकजस्ता दैनिक वस्तुहरूमा भन्सार महसुल लागू हुनेछ।’

यसअघि अमेरिकी राष्ट्रपति डोनाल्ड ट्रम्पले अवैध आप्रवासन र लागुऔषधबाट हुने खतरालाई उद्धृत गर्दै क्यानडा, मेक्सिको र चीनमा व्यापक भन्सार महसुल लगाउने घोषणा गरेका थिए।

संयुक्त राज्य अमेरिकामा क्यानडाको निर्यातले मंगलबारदेखि २५ प्रतिशत करको सामना गर्नेछ। यद्यपि, क्यानडाबाट आउने ऊर्जा स्रोतहरूमा १० प्रतिशत कम कर लाग्नेछ।

व्यापार द्वन्द्वले क्यानाडाली र अमेरिकीहरू दुवैका लागि ‘वास्तविक परिणामहरू’ ल्याउने ट्रुडोले बताए। यसमा रोजगारी गुम्ने, खाद्यान्न र पेट्रोलको मूल्य बढ्ने, सवारीसाधन असेम्बली प्लान्टहरू सम्भावित बन्द हुने र क्यानाडाली निकेल, पोटास, युरेनियम, स्टिल र एल्मुनियमको पहुँचमा बाधा पुग्नेजस्ता समस्याहरू समावेश छन्।

प्रधानमन्त्री ट्रुडोले क्यानडाले इरान बन्धक संकट र अफगानिस्तान युद्धदेखि हरिकेन क्याट्रिना र हालैका क्यालिफोर्निया डढेलोजस्ता घातक प्राकृतिक प्रकोपहरूसम्म अमेरिकाको ‘अँध्यारो समय’मा साथ दिएको स्मरण गराएका छन्।

‘यदि राष्ट्रपति ट्रम्प संयुक्त राज्य अमेरिकाका लागि नयाँ स्वर्ण युगको सुरुवात गर्न चाहनुहुन्छ भने क्यानडासँग साझेदारी गर्नु राम्रो बाटो हो, हामीलाई सजाय दिनु होइन । दुर्भाग्यवश आज ह्वाइटहाउसले लिएका कदमहरूले हामीलाई एकजुट गर्नुको साटो विभाजित गरेका छन्,’ उनले भने।

यसअघि ट्रुडोले प्रान्तीय प्रिमियरहरूसँग परामर्श गरेका थिए। उनीहरू प्रत्येकले पछि स्थानीय पसलहरूबाट अमेरिकी मदिरा हटाउने र आफ्ना व्यापारिक सम्बन्धलाई तुरुन्तै विविधिकरण गर्न खोज्नेजस्ता अतिरिक्त कदमहरू चाल्ने बताएका छन्।

अल्बर्टाकी प्रिमियर डेनिएल स्मिथले अमेरिकी भन्सार महसुललाई ‘पारस्परिक विनाशकारी नीति’ भन्दै यसले दुई राष्ट्रबिचको महत्त्वपूर्ण सम्बन्ध र गठबन्धनमा तनाव ल्याउने बताइन्।

ब्रिटिस कोलम्बियाका प्रिमियर डेभिड इबीले अझ अगाडि बढेर अमेरिकी भन्सार महसुललाई दुई देशहरूबिचको ऐतिहासिक बन्धनको पूर्ण विश्वासघात भने। ‘यो एक विश्वसनीय सहयोगी र मित्रविरुद्धको आर्थिक युद्धको घोषणा हो,’ सम्बन्धमा पर्ने क्षति दीर्घकालीन हुने चेतावनी दिँदै उनले भने, ‘हामी फेरि कहिल्यै ह्वाइटहाउसमा बस्ने एक व्यक्तिको लहडको अधीनमा रहनेछैनौँ।’

यसैबिच, ओटावामा ओटावा सिनेटर्स र मिनेसोटा वाइल्डबिचको एनएचएल हकी खेलमा क्षमताभन्दा बढी दर्शकहरूले खेल सुरु हुनुअघि अमेरिकी राष्ट्रिय गान गाउँदा विरोध जनाएका थिए।