तीन अर्ब ठगी गर्ने माइकलको खातामा भेटियो करोडौँ रकम 

अनलाइनबाट संगठित रूपमा तीन अर्बभन्दा धेरै ठगी गर्ने गिरोहका नाइके कैलालीका माइकल डगौरा (चौधरी)को खातामा करोडौँ रकम भेटिएको छ। प्रहरीको केन्द्रीय अनुसन्धान ब्युरो(सिआइबी)का अनुसार उनको विभिन्न बैंक खातामा करिब १० करोड रुपैयाँ भेटिएको छ।  

प्रहरीले माइकलसहित सातजनालाई पक्राउ गरी अनुसन्धान गरिरहेको छ। ठगी गर्नेमा कैलालीको बर्दगोरिया गाउँपालिका– ६ घर भई काठमाडौंको बुढानीलकण्ठ बस्ने माइकलसहित उनका सहयोगी सोही स्थानका अनिल विश्वकर्मा, काठमाडौं बुढानीलकण्ठका पीयूष श्रेष्ठ, दोलखा भीमेश्वरका आश्विन चौलागाईं, रौतहटका सत्यमकुमार सहनी र भारतीय नागरिकद्वय रोशन कुमार र मुन्ना कुमार छन्।

सो गिरोहले एक वर्षभन्दा लामो समयदेखि अनलाइन ठगी गर्दै आएको सिआइबीले जनाएको छ। ‘डिजिटल फरेन्सिक रिपोर्टअनुसार तीन अर्बभन्दा धेरै ठगी गरेको देखिन्छ,’ सिआइबीका प्रवक्ता एसपी सुधीरराज शाहीले भने, ‘यसरी ठगी गरेकोमध्ये करिब ५४ करोड क्रिप्टोमा लगानी गरेका छन् ।’ सिआइबीले उनीहरूमाथि ठगीसहित क्रिप्टो र हुन्डी कारोबारमा पनि अनुसन्धान भइरहेको जनाएको छ। 

२२ वर्षीय माइकल आइटीका विद्यार्थी हुन् । उनले बुढानीलकण्ठमा घर किन्नुका साथै महँगो गाडीसमेत खरिद गरिसकेका थिए । कुनै पेसामा आबद्ध नभएका उनले अनलाइन ठगी र क्रिप्टो कारोबारबाटै सो सम्पत्ति कमाएको प्रहरी अधिकारी बताउँछन् । उनको बाइनान्स एपमा ५४ करोडबराबरको मौज्दात देखिएको छ ।  

एसपी शाहीका अनुसार मुख्य गरी इसेवाका प्रयोगकर्तालाई आफूहरू अफिसबाट बोलेको भन्दै फोन गरी सिस्टम अपडेटका नाममा ओटिपी मागेर खाता ह्याक गरी पैसा चोरी गर्दै आएका थिए । यसरी ठगिनेको संख्या ठुलो रहेको प्रहरी अधिकारी बताउँछन् । 

यस्तो थियो माइकलको ठगी नेटवर्क 

उनीहरूले धेरैजसो पोस्टपेड नम्बर चलाउने इसेवा प्रयोगकर्तालाई लक्षित गरेको अनुसन्धानमा आबद्ध प्रहरी अधिकारी बताउँछन् । यसरी फोन गर्न उनीहरूले करिब ४० वटा सिमकार्ड निकालेका थिए । त्यस्ता सिमकार्ड नक्कली परिचयपत्रका आधारमा निकालेर संगठित रूपमा यस्तो ठगी भएको थियो । 

कतिपयलाई सामाजिक सञ्जालमा अनलाइन जागिरको विज्ञापन गरी लिंक पठाएर साइबर फिसिङ गरेका छन् । ठगीको पैसा उनीहरूले विभिन्न व्यक्तिको खाता हुँदै विदेश पठाउने गरेका थिए । यो गिरोहमा संलग्न धेरैजना फरार रहेको एसपी शाही बताउँछन् । प्रहरीले पक्राउ परेका आरोपीविरुद्ध संगठित अपराधको कसुरमा पनि अनुसन्धान अघि बढाएको छ । 
गिरोहका नाइके चौधरीले विदेशीहरूसँगको संगतमा आफूले यस्तो ठगी सिकेको प्रहरीसँग बताएका छन् । उनी काठमाडौंको एक कलेजमा आइटीसम्बन्धी विषयमा स्नातक तहमा अध्ययनरत छन् । उनीविरुद्ध सम्पत्ति शुद्धीकरणको कसुरमा पनि अनुसन्धान अघि बढेको छ।