- वि.सं २o८१ माघ ८ मंगलबार
नेपाल कम्युनिस्ट पार्टी (एमाले)का उपमहासचिव प्रदीप ज्ञवालीले दुई ठुला दल कांग्रेस र एमालेको सरकार बनेपछि मुलुकमा विकासले लय लिन थालेको बताएका छन्।
एमाले लमजुङद्वारा आज बेँसीसहर नगरपालिका– ८ स्थित मदन–आश्रित भवनमा आयोजित तीनदिने प्रशिक्षक प्रशिक्षण कार्यक्रमको उद्घाटन गर्दै उपमहासचिव ज्ञवालीले वर्तमान सरकार बनेपछि अर्थतन्त्र, सुशासन, पूर्वाधार, शिक्षा, स्वास्थ्यलगायत क्षेत्रले गति लिन थालेको बताए। सुशासन र प्रभावकारी सेवाका लागि कानुन बनेकाले सहकारीपीडितले समेत राहत पाउन थालेका उनको भनाइ थियो।
‘अधिकारसम्पन्न सहकारी प्राधिकरण बनेको छ,’ उनले भने। मुलुकमा देखिएको संकट समाधान गर्न दुई ठुला दल एक ठाउँमा आएका उल्लेख गर्दै उपमहासचिव ज्ञवालीले कांग्रेस र एमालेबिच विशेष सहमति बनेको बताए। सरकारलाई घेराबन्दीमा पार्न विभिन्न चलखेल सुरु भए पनि त्यसले कुनै असर नपार्ने उनको भनाइ थियो।
‘कांग्रेस र एमाले प्रमुख प्रतिस्पर्धी दल मात्र नभएर एक–अर्काका सहयात्री भएकाले मुलुक सञ्चालन गर्न दुवै दल गम्भीर छन्,’ उपमहासचिव ज्ञवालीले भने। वर्तमान सरकारलाई बलियो बनाएर अघि बढ्दै एमालेलाई एक नम्बरको राष्ट्रिय शक्ति बनाउने लक्ष्य रहेको उनले बताए। मुलुकमा तत्काल देखिएका समस्या समाधान गर्न अध्यादेश ल्याएको र यसको सरकारको आयुसँग कुनै सम्बन्ध नरहेको उपमहासचिव ज्ञवालीले स्पष्ट पारे।
