फाल्गुनन्द अगुवा समाज सुधारक : सभामुख

सभामुख देवराज घिमिरेले किराँत धर्मावलम्बीका महागुरु फाल्गुनन्द मुलुकका अगुवा समाज सुधारक रहेको बताएका छन्। फाल्गुनन्दको १४०औँ जन्मजयन्तीका अवसरमा ललितपुरको महालक्ष्मी– ८, शंखादेवीमा भएको कार्यक्रममा सभामुख घिमिरेले ‘सत्य धर्म मुचुल्का’ आज पनि उत्तिकै सान्दर्भिक रहेको बताए। ‘किराँत भाषा, लिपि, संस्कार, संस्कृति एवं समाज सुधारमा फाल्गुनन्दको योगदान महत्त्वपूर्ण छ,’ सभामुख घिमिरेले भने, ‘१९८८ साल वैशाख २४ गते जारी गरिएको सत्य धर्म मुचुल्का समाजको मार्गदर्शन थियो।’

किराँत माङ्सेसे हाङ्साम माङ्हिमले आयोजना गरेको कार्यक्रममा सभामुख घिमिरेले मद्यपान तथा मासु सेवन नगर्ने, मृत्यु संस्कार तीन दिनमा सम्पन्न गर्नेजस्ता फाल्गुनन्दका नीति समाज सुधारका लागि महत्त्वपूर्ण दस्ताबेज भएको बताए। उनले फाल्गुनन्दले प्रतिपादन गरेका सिद्धान्तलाई किराँत समुदायमा मात्रै सीमित नगरी देशैभर फैलाउन जरुरी रहेको बताए।

कार्यक्रममा प्रतिनिधिसभा सदस्य प्रेमबहादुर महर्जनले भाषा, लिपि, संस्कार, संस्कृति, समान शिक्षा फाल्गुनन्दका महत्त्वपूर्ण नीति रहेको बताए। प्रदेश सभा सदस्य एवं बागमती प्रदेशका पूर्वस्वास्थ्यमन्त्री रामेश्वर श्रेष्ठले फाल्गुनन्दले किराँत समाज सुधारमा पुर्‍याएको योगदानको स्मरण गरे। कार्यक्रममा महालक्ष्मी नगरपालिकाका नगरप्रमुख हरिगोविन्द श्रेष्ठलगायतको उपस्थिति थियो।