प्रमुख प्रतिपक्षी दल कांग्रेसले महासमिति बैठकको तीन महिना बित्दासम्म पनि आधिकारिक निर्णय सार्वजनिक गर्न सकेको छैन । कांग्रेसको नीति तय गर्ने गरी गत फागुनमा ललितपुरको गोदावरीमा सम्पन्न बैठकको ठोस निर्णय अझै सार्वजनिक हुन नसकेको हो ।
तत्कालीन समयमा सरकारमा रहेको कांग्रेसमा गठबन्धनको विषय पेचिलो बनेपछि बैठकमा आएका सुझाव समेटेर केन्द्रीय समिति बैठकबाट निर्णय लिने गरी बैठक समापन गरेको थियो । महासमिति बैठकमा गठबन्धन नगर्ने निर्णय तत्काल लिनुपर्ने र रणनीतिक हुनुपर्ने दुईथरी मत आएका थिए । तत्काल विवाद साम्य बनाउन कांग्रेसले केन्द्रीय समितिबाट निर्णय लिने मध्यमार्गी बाटोबाट बैठक समापन गरेको थियो । तर, तत्कालीन समयमा सत्तामा रहेको कांग्रेसले प्रतिपक्षमा पुग्दा पनि आफ्नो नीति स्पष्ट पार्न सकेको छैन ।
कांग्रेस प्रवक्ता डा. प्रकाशशरण महतले केन्द्रीय समिति बैठकमा छलफल हुन नसक्दा निर्णय सार्वजनिक गर्न ढिलाइ भएको बताए । अब बस्ने केन्द्रीय समिति बैठकले यो विषय टुंगो लगाउने उनको दाबी छ । ‘पछिल्लो समय विकसित घटनाक्रमका कारण केन्द्रीय समिति बैठक बस्न सकेको छैन । अब बस्ने बैठकमा घनीभूत छलफल गरेर निर्णयमा पुग्नेछौँ । छिट्टै बैठक बसेर सबै विषयमा समीक्षा हुनेछ । महासमितिको निर्णयसहित सबै विषयमा गम्भीर छलफल गरेर कांग्रेसको आगामी रणनीति तय गर्नेछौँ,’ उनले भने ।
७ देखि १० फागुनसम्म गोदावरीमा बसेको बैठकले महासमिति बैठकमा विशेष रूपमा गठबन्धनको विषयमा तत्काल निर्णय लिनुपर्ने र रणनीतिक हुनुपर्ने धारणा आएका थिए । कांग्रेसले बैठकमा पेस भएका प्रस्तावमा सहभागीबाट आएका सुझाव समेटेर केन्द्रीय समितिबाट निर्णयमा पुग्ने मध्यमार्गी बाटो लिएको थियो । बैठकमा महामन्त्री गगन थापाले आगामी निर्वाचनमा आफ्नै तागतमा एक्लै लड्ने र गठबन्धन नगर्ने प्रस्ताव ल्याएका थिए । तर, अर्का महामन्त्री विश्वप्रकाश शर्माले गठबन्धन रणनीतिक विषय भएकाले यसबारे अहिले निर्णय गर्न आवश्यक नरहेको प्रस्ताव पेस गरेका थिए । उपसभापति पूर्णबहादुर खड्काको प्रतिवेदनमा भने गठबन्धनको विषय मौन थियो । गठबन्धनको विषय महासमिति बैठकमा पेचिलो बनेको थियो । सभापति शेरबहादुर देउवासहित संस्थापन पक्षका नेता गठबन्धनबारे अहिले नै निर्णय लिन आवश्यक नभएको भन्ने पक्षमा थिए । ‘प्राप्त सुझावका आधारमा केन्द्रीय कार्यसमितिले परिमार्जनसहित अन्तिम रूप दिने गरी तीनवटै प्रस्ताव महासमितिको बैठक सर्वसम्मतिले पारित गर्दछ,’ बैठकको निर्णयमा भनिएको थियो ।
महासमिति बैठकले तत्कालीन माओवादी–कांग्रेस गठबन्धनलाई निरन्तरता दिने निर्णय लिएको थियो । तर, बैठकलगत्तै गत २१ फागुनमा कांग्रेस–माओवादी गठबन्धन टुटेको थियो । सत्ता समीकरणमा फेरबदलसँगै कांग्रेस सत्ताबाट प्रमुख प्रतिपक्षीको हैसियतमा आइपुगेको छ । गठबन्धन टुटेपछि १५ वैशाखमा भएको उपनिर्वाचनमा कांग्रेसले इलाम २ मा विगतको तुलनामा मत गुमाउन पुग्यो भने बझाङ प्रदेश सभा (१) मा यसअघिको सिटसमेत गुमायो । कांग्रेसले सरकारबाट बाहिरिएपछिको अवस्थामा पनि यसबारे समीक्षा गरेको छैन । महासमितिपछि बसेका केन्द्रीय समिति बैठकमा यो एजेन्डा र छलफलको विषय बन्न सकेको छैन ।
केन्द्रीय सदस्यहरूले कांग्रेसको नीतिबारे निर्णय लिने महत्वपूर्ण विषयमा छलफलका लागि केन्द्रीय समिति केन्द्रित हुन नसकेको भन्दै असन्तुष्टि जनाउँदै आएका छन् । असन्तुष्ट केन्द्रीय सदस्यहरूले पार्टीले नीति स्पष्ट गरेर जानुपर्ने भन्दै दबाब बढाएका छन् । केन्द्रीय सदस्य सञ्जय गौतमले निर्णयमा ढिलाइले कांग्रेसको नीति स्पष्ट हुन नसकेको र अलमलमा देखिएको बताए । नेतृत्वलाई निरन्तर दबाब दिए पनि केन्द्रीय समिति बोलाएर निर्णयमा पुग्न नेतृत्व गम्भीर नदेखिएको उनको आरोप छ ।
‘निर्णयमा ढिलाइले कांग्रेस अलमलमा देखिएको छ, हामीले पटकपटक सभापति, उपसभापतिहरू र महामन्त्रीहरूलाई भनेका हौँ । केन्द्रीय समिति बैठक नै बस्न नसक्दा यसबारे गम्भीर रूपमा छलफल गरेर निष्कर्षमा पुग्न सकिएको छैन । असारको पहिलो साता बैठक राख्ने अनौपचारिक जानकारी पाएका छौँ । अबको बैठकमा यसबारे गम्भीर छलफल हुन्छ,’ उनले भने ।
केन्द्रीय सदस्य नागिना यादवले प्रतिपक्षमा पुगेपछि संसद्मा व्यस्तता र बजेट अधिवेशनलगायतका कारण केन्द्रीय समिति बैठक बस्न ढिलाइ भएको बताइन् । बजेट अधिवेशनलगत्तै बस्ने केन्द्रीय समिति बैठकले यो विषय टुंगोमा पु¥याउने उनको दाबी छ । ‘महासमिति बैठकको निर्णय अनुमोदन गर्न केही ढिलाइ भएको छ । महासमितिलगत्तै हाम्रो भूमिका प्रतिपक्षको भयो । पछिल्लो समय सहकारी प्रकरणले गर्दा हामी सदन र सडकमा केन्द्रित भयौँ । अधिकांश केन्द्रीय सदस्य सदनमा पनि भएकाले बैठक राख्न सम्भव नभएको हो । बजेट अधिवेशनलगत्तै केन्द्रीय समिति बैठक बस्ने तयारी छ । बैठकमा गम्भीर रूपमा छलफल हुनेछ र महासमितिको निर्णयलाई अनुमोदन गर्नेछौँ,’ उनले भनिन् ।
अर्का केन्द्रीय सदस्य प्रकाश रसाइली स्नेही पनि तत्काल केन्द्रीय समिति बैठक बोलाएर महासमिति बैठकको ठोस निर्णय सार्वजनिक गर्नुपर्ने बताउँछन् । केन्द्रीय सदस्य नैनसिंह महरले लिखित रूपमै तत्काल केन्द्रीय समिति बोलाएर महासमिति बैठकको निर्णय स्पष्ट गर्न माग गरेका छन् । केन्द्रीय सदस्य अर्जुननरसिंह केसीले राजनीतिक उतारचढावले केन्द्रीय समिति बैठक बसेर निर्णय सार्वजनिक गर्न ढिलाइ भएको बताए । ‘पछिल्लो समय संसद्को अलमल र राष्ट्रिय राजनीतिले पनि केन्द्रीय समितिमा छलफलको वातावरण बन्न सकेन,’ उनले भने, ‘सबै रूपमा ढिलाइ भएकै हो । अब कांग्रेसलाई अलमलिएर बस्ने छुट छैन । अब बस्ने बैठकमा गम्भीर छलफल हुन्छ ।’
डा. प्रकाशशरण महत
प्रवक्ता, कांग्रेस
पछिल्लो समय विकसित घटनाक्रमका कारण केन्द्रीय समिति बैठक बस्न सकेको छैन । अब बस्ने बैठकमा घनीभूत छलफल गरेर निर्णयमा पुग्नेछौँ । छिट्टै बैठक बसेर सबै विषयमा समीक्षा हुनेछ । महासमितिको निर्णयसहित सबै विषयमा गम्भीर छलफल गरेर कांग्रेसको आगामी रणनीति तय गर्नेछौँ ।
सञ्जय गौतम
केन्द्रीय सदस्य, कांग्रेस
निर्णयमा ढिलाइले कांग्रेस अलमलमा देखिएको छ, हामीले पटकपटक सभापति, उपसभापतिहरू र महामन्त्रीहरूलाई भनेका हौँ । केन्द्रीय समिति बैठक नै बस्न नसक्दा यसबारे गम्भीर रूपमा छलफल गरेर निष्कर्षमा पुग्न सकिएको छैन । असारको पहिलो साता बैठक राख्ने अनौपचारिक जानकारी पाएका छौँ । अबको बैठकमा यसबारे गम्भीर छलफल हुन्छ ।