- वि.सं २o८१ बैशाख २९ शनिबार
नेपाल वायुसेवा निगमको न्यारोबडी ९एन–एकेएक्स जहाजको इन्जिन मर्मतमा ढिलाइ भएको सम्बन्धमा छानबिन गर्न उपसमिति गठन भएको छ । २३ वैशाखमा निगमका कार्यकारी अध्यक्ष युवराज अधिकारीको अध्यक्षतामा बसेको सञ्चालक समितिको बैठकले सञ्चालक समिति सदस्य वरिष्ठ क्याप्टेन सुधीरशमशेर राईको संयोजकत्वमा पाँच सदस्यीय छानबिन उपसमिति गठन गरेको हो ।
समितिलाई निगमको जहाजको इन्जिन इजरायल एरोस्पेस इन्डस्ट्री (आइएआई)मा मर्मत–सम्भार गर्न पठाउँदा समयमा नआएको र भाडाको इन्जिन समयमा नदिएको सम्बन्धमा छानबिन गरी १५ दिनभित्र राय सिफारिससहित प्रतिवेदन पेस गर्न कार्यादेश दिइएको छ ।
यसअघि निगम र आइएआईबीच भएको सम्झौताबमोजिम काम गर्न नसकेर ढिलाइ भएकोमा क्षतिपूर्तिसमेत दाबी गर्न २२ फागुनमा सिएम डिपार्टमेन्टलाई आदेश दिइएको थियो ।
सम्झौताको सर्तअनुसार आइएआईले समयमा काम गर्न नसकेको विषयमा विस्तृत विश्लेषण गरी क्षतिपूर्ति दाबी गर्न सिएम डिपार्टमेन्टले आवश्यक काम अगाडि बढाएको बताइएको छ ।
