- वि.सं २o८o चैत १८ आइतबार
१९९० सालको भूकम्पपछि हराएको जयबागेश्वरी नवाली टोलको ‘ग्वलः दे फल्चा’ खोजेर काठमाडौं महानगरपालिका–८ ले पुनरुत्थान सुरु गरेको छ । फल्चा पुनर्निर्माणका लागि वडाध्यक्ष एवं सम्पदा तथा पर्यटन समितिका संयोजक आशामान संगतले शनिबार जगपूजा तथा शिलान्यास गरेका छन् ।
घरको भित्तामा फेला परेको शिलापत्र अध्ययन र करिब ०५० सालतिर तयार पारिएको विवरण पुस्तिकाको फोटो हेरेर फल्चा पुनरुत्थानको निर्णय भएको थियो । शिलापत्रमा फल्चा निर्माण नेपाल संवत् ८२० मा र पुनर्निर्माण ८७३ मा भएको उल्लेख छ । ‘यसअनुसार फल्चा करिब तीन सय २४ वर्ष पुरानो हो,’ संगतले भने, ‘स्थानीय पाका मानिसका अनुसार ९० सालको भूकम्पपछि फल्चा हराएको थियो ।’
पशुपति क्षेत्रलाई पहिले ग्वलः दे (ग्वल देश) भनिन्थ्यो । त्यही नामबाट फल्चाको नाम भएबाट यसको प्राचीनता बुझ्न सकिन्छ । फल्चा पुनरुत्थानका लागि वडाले करिब १५ लाख रुपैयाँ खर्च गर्नेछ । फल्चा १४ फिट लम्बाइ र साढे ६ फिट चौडाइको हुनेछ ।
