पर्सामा जारी प्रो क्लब च्याम्पियनसिपअन्तर्गत आजको दोस्रो खेलमा नेपाल आर्मी क्लबले नेपाल पुलिस क्लबमाथि आठ विकेटको सानदार जित हासिल गरेको छ । आर्मीको जितमा साहब आलमको उत्कृष्ट बलिङ प्रदर्शनको योगदान मुख्य रह्यो ।
साहबले चार ओभरमा केवल चार रन दिएर तीन विकेट लिएपछि नेपाल पुलिस १८.४ ओभरमा ५८ रनमै अलआउट भएको थियो । जवाफमा ५९ रनको सहज लक्ष्य आर्मीले सातौँ ओभरको पहिलो बलमा दुई विकेटको क्षतिमा पूरा गर्याे ।
आर्मीका लागि रोहितकुमार पौडेलले १४ बलमा अविजित २१ रन बनाए भने ११ बलमा १४ रन बनाएका कप्तान विनोद भण्डारी पनि अविजित रहे ।
ओपनर सन्तोष कार्कीले ११ बलमै २० तथा कुशल मल्लले दुई बलमा दुई रन बनाए । पुलिसका ललित राजवंशी र शेर मल्लले एक–एक विकेट लिए । करण केसी र सागर ढकाल महँगो साबित भए । निकै कम रनको लक्ष्यमा करणले पहिलो ओभरमै १३ रन दिए भने दुई ओभर बलिङ गरेका सागरले १७ रन दिए ।
त्यसअघि करणले नै सर्वाधिक १५ रन बनाएपछि नेपाल पुलिसले अर्धशतक पूरा गरेको थियो । पुलिसका अमित श्रेष्ठले ११ रन बनाए भने अन्य कुनै पनि ब्याटरले दोहोरा अंक छुन सकेनन् ।
ओपनर अर्जुन साउद ६, दिलीप नाथ एक, कप्तान आरिफ सेख तीन, सुनील धमला दुई, सागर ढकाल एक तथा शेर मल्लले चार रन बनाए । शंकर राना र रसिद खान शून्य रनमा आउट भए ।
आर्मीको तर्फबाट बलिङमा चम्किएका साहबलाई बसिर अहमदले दुई तथा कुशल मल्ल र अविनाश करणले एक–एक विकेट लिए ।