साविक विजेता वेस्ट इन्डिज आइसिसी पुरुष टी–२० विश्वकप क्रिकेट प्रतियोगिता सुपर–१२ मा लगातार दोस्रो खेलमा पराजित भएको छ । समूह १ को आफ्नो दोस्रो खेलमा वेस्ट इन्डिज दक्षिण अफ्रिकासँग आठ विकेटले पराजित भएको हो । पहिलो ब्याटिङ गरेको वेस्ट इन्डिजले २० ओभरमा आठ विकेटको क्षतिमा एक सय ४३ रनको मध्यम योगफल खडा गरेको थियो । प्रत्युत्तरमा दक्षिण अफ्रिकाले १८.२ ओभरमा दुई विकेटको क्षतिमा एक सय ४४ रन जोड्यो ।
दक्षिण अफ्रिकाको जितमा एडेन माक्र्राम र भान डेर दुसेनले तेस्रो विकेटका लागि नौ ओभरमा ८३ रनको साझेदारी गरे । एडेनले २६ बलमा चार छक्का र दुई चौका प्रहार गरी ५१ रनको योगदान दिए । भान डेर ५१ बल सामना गरी ४३ रनमा नटआउट रहे । उनले आफ्नो इनिङ्समा तीन चौका ठोके । यी दुवै ब्याट्सम्यानले ९.२ ओभरमा ६१–२ को अवस्थाबाट साझेदारी गरेका हुन् ।
लक्ष्य पछ्याउँदा दक्षिण अफ्रिकाको सुरुवात खराब भयो । इनिङ्सको छैटाैँ बलमै दक्षिण अफ्रिकाका कप्तान तथा ओपनर टेम्बा बभुमा दुई रनमा रनआउट भए । त्यसपछि रेजा हेन्ड्रिक्स र भान डेरबीच दोस्रो विकेटका लागि ५७ रनको साझेदारी भयो । रेजाले ३० बलमा चार चौका र एक छक्का प्रहार गरी ३९ रन बटुले । वेस्ट इन्डिजले पहिलो खेलमा इंग्ल्यान्डसँग केवल ५५ रनमै अलआउट भएको थियो । आइसिसी टी–२० विश्वकपमा वेस्ट इन्डिजले जोडेको ५५ रन तेस्रो कम योगफल हो ।
दुबई अन्तर्राष्ट्रिय रंगशालामा वेस्ट इन्डिजले दक्षिण अफ्रिकाविरुद्ध सुधारिएको ब्याटिङ प्रदर्शन गर्यो । कप्तान किरन पोलार्डपछिका ब्याट्सम्यानले भने सोचेको जस्तो योगदान दिन सकेनन् । शीर्ष पाँच ब्याट्सम्यानले मात्र दक्षिण अफ्रिकी बलरविरुद्ध टिकेर खेले ।
वेस्ट इन्डिजको सुरुवात निकै उत्कृष्ट भयो । ओपनरद्वय लेन्डल सिमोन्स र इभिन लेविसबीच १०.३ ओभरमा ७३ रनको साझेदारी भएको थियो । लेविस पहिलो विकेटका रूपमा आउट भए । उनले ३५ बलमा ६ छक्का र तीन चौकाको सहयोगमा ५६ रनको योगदान दिए । निकोलास पुरन र क्रिस गेलले समान १२ रन जोडे । ओपनर सिमोन्सले ३५ बलको सामना गरी केवल १६ रन मात्र बनाए । एक घन्टा क्रिजमा बस्दा सिमोन्सले एकपटक पनि बाउन्ड्री प्रहार गरेनन् । कप्तान पोलार्डले २० बलमा दुई चौका र एक छक्का प्रहार गरी २६ रनको योगदान दिए । दक्षिण अफ्रिकाका लागि बलिङमा केशव महराजले २४ रन खर्चेर दुई विकेट हात पारे ।
