जिल्ला प्रशासन कार्यालय पर्साले अवैध तरिकाले दोहोरो नेपाली नागरिकता लिएका ७८ जनाको फाइल अनुसन्धानपछि जिल्ला प्रहरी कार्यालय पर्सामा पठाएको छ । विभिन्न समयमा झुटो विवरण पेस गरी दोहोरो नेपाली नागरिकताको प्रमाणपत्र लिनेहरूविरुद्ध अनुसन्धान गर्दै जिल्ला प्रहरी कार्यालय पर्सामा पठाएको हो ।
विभिन्न समयमा आएको उजुरीका आधारमा अनुसन्धान गर्दै कारबाही प्रक्रिया अगाडि बढाइएको हो । पर्सामा दोहोरो नागरिकतासम्बन्धी बढी उजुरी आउने गरेको पर्साका सहायक प्रमुख जिल्ला अधिकारी भीमकान्त पौडेलले बताए । उनले भने, ‘नागरिकताबारे आएका उजुरी, गुनासो हेरेर कानुनविपरीत भएको पाइए कारबाहीको सिफारिस गर्ने हो । मन्त्रालयले महसुस गरेमा अन्य जिल्लामा पनि अध्ययन हुन सक्छ ।’
प्रजिअ पौडेलका अनुसार विगतमा पटक–पटक झुटो विवरण पेस गरेर नेपाली नागरिकता प्राप्त गरेकाहरूको नागरिकता सरकारले खारेज गरेको छ । जिल्ला प्रशासन कार्यालय, पर्साको तथ्यांकअनुसार गत वर्षको साउनदेखि हालसम्म तीन हजार आठ सय ५० जनाले वंशजका आधारमा नागरिकता पाइसकेका छन् । दुई हजार एक सय ४६ जनाले जन्मका आधारमा र वैवाहिक अंगीकृत नागरिकता सात सय १६ जनाले लिएका छन् ।
गृह मन्त्रालयका प्रवक्ता सहसचिव रामकृष्ण सुवेदीले कुनै अवैध नागरिकताबारे उजुरी परेमा मन्त्रालयले छानबिन गर्ने बताए । सुवेदीले भने, ‘कुन–कुन जिल्लामा के छ भनेर त भन्न सक्दिनँ । तर, गुनासो, उजुरी आएका कुरालाई गम्भीरतापूर्वक लिएर अनुसन्धान र अध्ययन गर्दै आएका छौँ ।’
