उदयपुरको कटारी नगरपालिका– १० तिनाखुस्थित जंगलमा लागेको डढेलोको कारण दुई घर जल्दा तीन लाख ५० हजारको क्षति भएको छ । जिल्ला प्रहरी कार्यालय उदयपुरका सूचना अधिकारी तथा डिएसपी केदारमान दोङका अनुसार जंगलको डढेलोले दुई घरमा क्षति पुर्याउँदा अनुमानित तीन लाख ५० हजारको क्षति भएको हो ।
बुधबार दिउँसो जंगलको डढेलो गाउँ पस्दा स्थानीय कौडेबहादुर दमाईंको ढुंगामाटोको पर्खाल र खरको छानो भएको एकतले मतान, काठपात, तीनवटा बाख्रा, १३ वटा कुखुरा जलेर नष्ट हुँदा अन्दाजी मूल्य एक लाखको क्षति भएको डिएसपी दोङले जानकारी दिए ।
यसैगरी, अर्का स्थानीय लिलबहादुर सुनुवारको ढुंगामाटोको पर्खाल र खरको छानो एतले मतान, विद्युतको मिटर बक्स, पाँचवटा बाख्राका पाठा, टिभी, भाँडावर्तन, अन्नपात, काठपात, लत्ताकपडालगायतका घरायसी सामान जल्दा अन्दाजी दुई लाख पचास हजारबराबरको क्षति भएको उनको भनाइ छ ।
आगो निभाउने क्रममा पीडित कौडेबहादुर दमाईंको हात र घाँटीमा पोली सामान्य घाइते भएकाले स्वास्थ्य चौकीमा उपचार गरिएको छ । अहिले जंगलमा लागेको आगो स्थानीय र प्रहरीले पूर्ण रूपमा नियन्त्रणमा लिइएको डिएसपी दोङले बताए ।
