डोएल मालेनको दुई गोलको सहयोगमा रोमानियालाई ३–० ले हराउँदै नेदरल्यान्ड्स अन्तिम आठमा पुगेको हो
नेदरल्यान्ड्सले युरो २०२४ फुटबल प्रतियोगिताको क्वार्टरफाइनल स्थान पक्का गरेको छ । प्रतियोगिताको सोमबार राति रोमानियामाथि ३–० को सादार जित निकाली नेदरल्यान्ड्सले अन्तिम आठको स्थान पक्का गरेको हो । अब सेमिफाइनल प्रवेशको खेलमा नेदरल्यान्ड्सले अस्ट्रिया र टर्कीबीचको विजेताविरुद्ध प्रतिस्पर्धा गर्नेछ । नेदरल्यान्ड्सले पहिलोमा एक र दोस्रो हाफमा दुई गोल गरेको थियो । रोमानिया १६ वर्षपछि प्रिक्वार्टरफाइनलमा पुगेको हो ।
आक्रामक रूपमा प्रस्तुत भएको नेदरल्यान्ड्सले रोमानियालाई खेलको कुनै पनि समयम आफूमाथि हाबी हुन दिएन । खेलको २०औँ मिनेटमा लिभरपुलका खेलाडी कोडी गाक्पोले सिमोन्सको पासमा नेदरल्यान्ड्सलाई १–० को अग्रता दिलाए । रोमानियाका गोलरक्षक फलोरिनलाई झुक्याउ्ँदै टोलीलाई अग्रता दिलाएका हुन् । चालू प्रतियोगितामा कोडीको तेस्रो गोल हो । खेलको २७औँ मिनेटमा कर्नर किकमा स्टेफानो डे भजको प्रहार क्रसबार नजिक हुँदै बाहिरिएको थियो ।
मध्यान्तरपछि नेदरल्यान्ड्स थप आक्रामक रूपमा प्रस्तुत भयो । यस समयमा नेदरल्यान्ड्सको एक गोल अफ साइड भएको थियो । खेलको ८२औँ मिनेटमा डोएल मालेनले नेदरल्यान्ड्सलाई २–० को स्थितिमा राखे । कोडी गाक्पोले चलाखीपूर्ण रूपमा लाइनबाट मालेनलाई सटिक पास दिएका थिए । मालेनले वान टचमै गोल गरे । यसअघि खेलको ६२औँ मिनेटमा काक्पोले क्लोज रेन्जमा गोल गर्न चुकेका थिए ।
अन्तिम इन्जुरी समयको तेस्रो मिनेटमा मालेनले काउन्टर एट्याक्समा नेदरयान्ड्सको जित ३–० को पक्का पारे । नेदरल्यान्ड्सले चालू युरो २०२४ मा रोमानियाविरुद्ध उत्कृष्ट प्रदर्शन गरेको थियो ।
