२०औँ एनएसजेएफ पल्सर स्पोर्टस् अवार्डका लागि मोबिलिटी पार्टनरका रूपमा राइड सेयरिङ एप इ–ड्राइभ नेपाल आयोजक नेपाल खेलकुद पत्रकार मञ्चसँग आबद्ध भएको छ । पल्सर स्पोर्टस् अवार्डका लागि इ–ड्राइभ नेपाल र मञ्चबीच सहप्रायोजनसम्बन्धी सम्झौता भएको छ । मञ्चका अध्यक्ष दुर्गानाथ सुवेदी र इ–ड्राइभ नेपालका अध्यक्ष राजेश मास्केले सम्झौतापत्रमा हस्ताक्षर गरेका छन् । इ–ड्राइभका अध्यक्ष मास्केले आगामी दिन यो सहकार्यलाई थप मजबुत बनाउने बताए । मञ्चका अध्यक्ष सुवेदीले स्पोर्टस् अवार्डको दायरा फराकिलो पार्ने क्रममा यस वर्ष फरक–फरक क्षेत्रसँग सहकार्य भएको जनाए ।
नौ विधामा प्रदान गरिने पल्सर स्पोर्टस् अवार्डको पिपल्स च्वाइस विधाको मनोनयन सार्वजनिक भइसकेको छ । पिपल्स च्वाइसमा फुटबलका अनन्त तामाङ, कराँतेका विप्लवलाल श्रेष्ठ, भलिबलकी निरुता ठगुन्ना, टेबलटेनिसकी सिक्का सुवाल श्रेष्ठ र शारीरिक सुगठनकी रजनी श्रेष्ठ मनोनयनमा परेका छन् । ०७९ को अन्य विधामा वर्षका उत्कृष्ट पुरुष, महिला र युवा तथा प्रशिक्षक विधाको मनोनयन पनि छिट्टै सार्वजनिक गरिने मञ्चका अध्यक्ष सुवेदीले बताए ।
पारा एथलिट सम्मान, स्पेसल अवार्ड, लाइफटाइम अचिभमेन्ट अवार्ड र एसियन स्पोर्टस् जर्नालिस्ट अवार्डको घोषणा २८ माघको कार्यक्रमकै दिन घोषणा हुनेछ । यसपटक वर्ष पुरुष, महिला, युवा, प्रशिक्षक र पिपल्स च्वाइस गरी पाँच विजेताले जनही बजाज पल्सर मोटरसाइकल पाउनेछन् । तीमध्ये दुईवटा एन २५० र तीनवटा एन १६० मोटरसाइकल छन् ।
