जग्गादातालाई सम्मान गर्दै बहुउद्देश्यीय ‘मंगला इन्द्रेणी पार्क’ उद्घाटन

म्याग्दीको मंगला गाउँपालिकाको केन्द्र बाबियाचौरमा निर्माण भएको ‘मंगला इन्द्रेणी पार्क’ उद्घाटन गरिएको छ। 

मंगला गाउँपालिका– २ बाबियाचौरनिवासी समाजसेवी इन्द्रबहादुर अधिकारीको परिवारले निःशुल्क उपलब्ध गराएको जग्गामा गाउँपालिका, गण्डकी प्रदेश सरकार र डिभिजन वन कार्यालय समेतको एक करोड रुपैयाँकाे लागतमा बहुउदेश्यीय पार्क निर्माण गरिएको हो। 

आइतबार एक समारोहबीच उक्त पार्कको गाउँपालिका अध्यक्ष सतप्रसाद रोका, उपाध्यक्ष प्रेमकुमारी क्षेत्री र जग्गादाता अधिकारीले उद्घाटन गरेका हुन्। 

आर्थिक वर्ष ०७५/७६ मा सुरु गरिएको पार्कको निर्माणकार्य सकिएपछि औपचारिक रूपमा उद्घाटन गरिएको हो। 

पार्कमा संग्रहालय, खानेपानी, गार्डेन, बाल उद्यान, ज्येष्ठ नागरिक दिवा सेवा केन्द्र, शाैचालयलगायतका पूर्वाधार निर्माण गरिएको छ। 

गाउँपालिकाको केन्द्रमा आउने पर्यटकहरूको आकर्षण र स्थानीय बालबालिका, युवायुवती र ज्येष्ठ नागरिकको फुर्सदको समयलाई उचित सदुपयोगका लागि पार्क सञ्चालनमा ल्याइएको गाउँपालिका अध्यक्ष रोकाले बताए। 

स्थानीय मौलिक संस्कृति र परम्परागत सामग्रीको संरक्षणका लागि संग्रहालयसमेत स्थापना गरिएको छ। पार्क बनाउन समाजसेवी इन्द्रबहादुर अधिकारीको परिवारले तीन रोपनी १५ आना ३ पैसा २ दाम क्षेत्रफलको जग्गा निःशुल्क उपलब्ध गराएका थिए भने थप पाँचआना क्षेत्रफलको जग्गा खरिद गर्न गाउँपालिका अध्यक्ष रोकाले एक लाख रुपैयाँ र मंगला युवा क्लबले २ लाख रुपैयाँ आर्थिक सहयोग गरेका थिए। 

आइतबार पार्क उद्घाटनको अवसरमा जग्गादाता र सहयोगदातालाई सम्मानसमेत गरिएको छ। बाजागाजासहित बाबियाचौर बजार परिक्रमापश्चात् पार्कमा आयोजित समारोहमा जग्गादाता अधिकारीको परिवारसँगै जग्गा खरिदमा सहयोग गर्ने गाउँपालिका अध्यक्ष रोका र मंगला युवा क्लबका पदाधिकारीलाई दोसल्ला र सम्मानपत्र प्रदान गरिएको थियो।

पार्क निर्माण गर्न डिभिजन वन कार्यालयले १८ लाख, गण्डकी प्रदेश सरकारबाट संग्रहालय भवन बनाउन १६ लाख र ज्येष्ठ नागरिक आश्रयस्थलको लागि  सात लाख बजेट उपलब्ध गराएका थिए। 

पार्कको जग्गा व्यवस्थापनदेखि पूर्वाधार निर्माण र संग्रहालय भवनलाई पूर्णता दिन गाउँपालिकाले करिब ६० लाख रुपैयाँभन्दा बढी लगानी गरेको जनाइएको छ। 

पार्कलाई निःशुल्क जग्गा दिने इन्द्रबहादुर अधिकारीको सम्मानमा पार्क परिसरमा अधिकारीको अर्धकदको सालिक बनाइएको छ भने संग्रहालयको नाम ‘मंगला खड्ग नन्द संग्रहालय’ नामकरण गरिएको गाउँपालिकाका प्रमुख प्रशासकीय अधिकृत पूर्णबहादुर खत्रीले जानकारी दिए। 

तस्बिर : कमल खत्री/नयाँ पत्रिका