‘कल सेन्टर’बाट चिनियाँ नागरिकको अवैध ऋण प्रवाह 

दुई दिनमा काठमाडौं र रुपन्देहीबाट करिब तीन सय जना पक्राउ

नेपाली भूमि प्रयोग गरी मध्यमवर्गीय नेपालीलाई चर्को ब्याजमा ऋण प्रवाह गर्ने धन्दामा चिनियाँ नागरिक संलग्न रहेको पाइएको छ । ऋण प्रवाह गर्न खोलिएका ‘कल सेन्टर’ नै फेला परेपछि घटना पुष्टि भएको हो । दुई दिनको फरकमा प्रहरीले काठमाडौं र रुपन्देहीमा यस्ता ऋण प्रवाह गर्ने ‘कल सेन्टर’ फेला पारेको हो । 

प्रहरीले आइतबार रूपन्देहीको तिलोत्तमा नगरपालिका–२ मा चिनियाँ नागरिकले खोलेको ब्लु स्काई बिजनेस सोलुसन नामको ‘कल सेन्टर’ फेला परेको थियो । जसमा चिनियाँ, भारतीय र नेपाली गरी दुई सय ५० जना पक्राउ परेका थिए । सोही प्रकृतिको ‘कल सेन्टर’ प्रहरीले सोमबार काठमाडौंको गैरीगाउँमा पनि फेला पारेको छ । जसमा चिनियाँ, भारतीय र नेपाली गरी ३६ जना पक्राउ परेका छन् । उनीहरूले स्काई वर्ड सर्भिस सेन्टरका नाममा ‘कल सेन्टर’ सञ्चालन गर्दै आएका थिए । 

एसपी दिनेश मैनाली, प्रवक्ता महानगरीय प्रहरी परिसर, काठमाडौं 

गैरकानुनी ढंगले ऋण प्रवाह भइरहेको सूचना थियो । प्रहरी निगरानीमा थियो । धन्दामा संलग्न चिनियाँ नागरिक पक्राउ परेका छन् । गत फागुनमा पनि केही चिनियाँ पक्राउ परेका थिए । धन्दाको प्रकृति हेर्दा विगतको र अहिलेको एउटै जस्तो देखिन्छ ।

महानगरीय प्रहरी परिसर काठमाडौंका प्रमुख एसएसपी भरतबहादुर बोहराले ‘कल सेन्टर’का नाममा मध्यमवर्गीय नेपालीलाई चर्को ब्याज असुलेर ऋण प्रवाह भइरहेको अनुसन्धानबाट खुलेको बताए । ‘अवैध रूपमा ‘कल सेन्टर’ खोली ऋण प्रवाह भइरहेको सूचनापछि छापा मार्दा चिनियाँ, भारतीय र नेपाली कामदारबाट धन्दा चलिरहेका भेटियो । ३६ जना पक्राउ परेका छन् । घटनाको अनुसन्धान जारी छ,’ उनले भने ।

प्रहरीका अनुसार सेन्टरका लगानीकर्ता चिनियाँ नागरिक ४३ वर्षीय हु युहा हुन् । सहयोगीका रूपमा उनले दुई भारतीय नागरिक २६ वर्षीय मनोज सैनी र १९ वर्षीय नेहा गुप्तालाई पनि राखेका थिए । घटनास्थलबाट ऋण प्रवाह गर्न राखिएको आठ लाख २९ हजार रुपैयाँ, तीन सय ३२ वटा ल्यापटप, सात सय ४८ वटा डेस्कटप कम्प्युटर बरामद भएका छन् । 

प्रहरीका अनुसार उनीहरूले ऋण प्रवाहका लागि इजी क्रेडिट, फ्री क्यास, ह्यान्डी लोन, गो लोन, रूपी स्टार, हाई क्यासलगायतका मोबाइल एप्स नै विकास गरेका थिए । सोही एप्सबाट उनीहरूले नेपाली नागरिकलाई चर्काे ब्याजमा ऋण प्रवाह गर्दै आएका थिए । ऋण प्रवाह गर्नुअघि ऋणीलाई अनलाइनबाटै फारम भर्न लगाउँथे । फारम र मोबाइलमार्फत ऋणीको सबै विवरण संकलन गर्थे । सावाँ रकमबाट तोकिएको ब्याज ऋण दिनुअघि नै उनीहरू असुल्थे । ऋण तिर्ने भाका पुगेपछि तिर्न फोन गर्थे । रकम तिर्न आनाकानी गरे ऋणको परिवारका सदस्यलाई फोन गर्थे । त्यति हुँदा पनि तिर्न अस्वीकार गरे सामाजिक सञ्जालमार्फत बेइज्जत गरिदिने धम्की दिन्थे । 

‘उनीहरूले ऋण दिनुअघि ऋणीको सबै विवरण लिन्थे । नतिरे परिवारका सदस्यलाई फोन गर्र्थे । त्यसबाट पनि नभए फोटो सामाजिक सञ्जालमा हालेर बेइज्जत गरिदिने भन्दै धम्की दिन्थे । यसमा नेपाली युवा प्रयोग गर्ने गरेका छन्,’ बोहराले भने ।

यसअघि प्रहरीले गत ९ फागुनमा गैरीगाउँबाटै चिनियाँ नागरिकसहित ३६ नेपालीलाई पक्राउ गरेको थियो । धन्दा चलाउन सिन्धुलीका दीपक श्रेष्ठको नाममा ‘लेमन ग्रुप अफ कम्पनी’ नामको कम्पनी नै खोलेका थिए । सोही दिन भक्तपुरको ठिमीबाट ८० नेपाली पक्राउ परेका थिए । गैरीगाउँको धन्दा पहिलेकै निरन्तरता रहेको प्रहरीको भनाइ छ । 

अनुसन्धानमा संलग्न काठमाडौं परिसरका प्रवक्ता एसपी दिनेश मैनालीले गैरकानुनी ढंगले ऋण प्रवाह गरी कल सेन्टर सञ्चालन विगतकै निरन्तरता रहेको बताए । ‘गैरकानुनी ढंगले ऋण प्रवाह भइरहेको सूचना थियो । प्रहरी निगरानीमा थियो । धन्दामा संलग्न चिनियाँ नागरिक पक्राउ परेका छन् । गत फागुनमा पनि केही चिनियाँ पक्राउ परेका थिए । धन्दाको प्रकृति हेर्दा विगतको र अहिलेको एउटै जस्तो देखिन्छ,’ उनले भने ।

उनीहरूले कम्प्युटरमा सिद्धहस्त नेपालीलाई कम्पनीमा नियुक्त गरेका थिए । एप्समार्फत ऋण प्रवाह गर्ने र समयमा ऋण नतिर्ने भारतीय नागरिकसँग टेलिफोनमार्फत डिल गर्नु उनीहरूको काम थियो । समयभित्रै ऋण उठाएबापत उनीहरूलाई निश्चित कमिसन पनि उपलब्ध हुन्थ्यो । त्यसबाहेक मासिक तलब प्रतिव्यक्ति १५ देखि १८ हजार रुपैयाँसम्म उपलब्ध गराउँदै आएका थिए ।