- वि.सं २o७८ माघ २० बिहीबार
अवैध सुन र मोबाइलसहित तीनजनालाई प्रहरीले पक्राउ गरेको छ। त्रिभुवन अन्तर्राष्ट्रिय विमानस्थलबाट तीनजना पक्राउ परेका विमानस्थल प्रहरीले जानकारी दिएको छ।
विमानस्थल प्रहरी कार्यालय प्रमुख भीम ढकालका अनुसार हिमालय एयरको विमानमा दुबईबाट आएका दुईजना र सारजहाँबाट आएका एकजनालाई पक्राउ गरिएको हो। उनका अनुसार चेकजाँचका क्रममा लुकाइछिपाई ल्याएको एक किलो १२५ ग्राम अवैध सुन र आइफोन १३ प्रो म्याक्स ५ थान भेटिएको छ।
पक्राउ पर्नेहरूमा रौतहट गौरका ३२ वर्षीय सुनीलकुमार साह, मकवानपुरको मनहरीका २८ वर्षीय नवराज परियार र सिन्धुपाल्चोकको भोटेकोसीका ३९ वर्षीय दावा छिरिङ शेर्पा रहेका छन्। उनीहरूमाथि थप अनुसन्धान अघि बढाइएको प्रहरीले जनाएको छ।
