- वि.सं २o७८ माघ ११ मंगलबार
भारतबाट आयातित सुन्तलामा अत्यधिक मात्रामा विषादी भएको तथ्य फेला परेको छ । खाद्य प्रविधि तथा गुण नियन्त्रण कार्यालय, नेपालगन्जले भारतबाट आयात हुने सुन्तलामा अत्यधिक मात्रामा विषादी फेला परेको जनाएको छ।
खाद्य प्रविधि तथा गुण नियन्त्रण कार्यालयले कात्तिकदेखि तरकारी र फलफूलमा रहेको विषादी मापन गर्न थालेको सूचना अधिकारी अमितभूषण सुमनले बताए । उनले फलफूलका पाँच सय ४४ वटा नमुना परीक्षण गर्दा दुईवटा नमुनामा खान नमिल्ने गरी विषादी प्रयोग भएको फेला परेको बताए ।
तरकारीको नमुना परीक्षण गर्दा खान अयोग्य फेला नपरेको उनले बताए । ‘विषादीको मात्रा तरकारीमा कम देखिए पनि सुन्तलाको दुईवटा नमुना खान अयोग्य फेला पर्यो,’ उनले भने ।
खाद्य प्रविधिले कात्तिकदेखि तरकारी र फलफूलको विषादी परीक्षण गर्न थालेको छ । तीन महिनामा तरकारी र फलफूलका चार हजार ८३ वटा नमुना परीक्षण गरिएको उनले बताए । यसअघि रानीतलाउ सब्जीमन्डीस्थित विषादी अन्वेषण द्रुत विश्लेषण इकाइले भारतबाट आयात हुने तरकारी र फलफूलको विषादी परीक्षण गर्दै आएको थियो ।
