Skip This
खानेपानीमन्त्री उमाकान्त चौंधरीले काठमाडौंवासीलाई छिटोभन्दा छिटो मेलम्ची खानेपानीको व्यवस्था गर्ने प्रतिबद्धता व्यक्त गरेका छन्। मन्त्री चौधरीले केही समयअघि आएको बाढी र पहिरोको कारणले बन्द भएको मेलम्चीको पानी काठमाडौंवासीलाई अस्थायी रूपमा भए पनि छिटोभन्दा छिटो खान पाउने व्यवस्था मिलाउने बताएका हुन्।
चन्द्रलोक प्रतिष्ठानले शनिबार काठमाडौंमा आयोजना गरेको कार्यक्रममा उनले संविधानमा शुद्ध खानेपानी र सरसफाइलाई मौलिक हकका रूपमा व्यवस्था गरेको उल्लेख गर्दै आफ्नो कार्यकालभित्रै काठमाडौंवासीका लागि मेलम्ची खानेपानीको व्यवस्था गर्ने बताए। उनले भने, ‘मेरो कार्यकालमा चाँडोभन्दा चाँडो मेलम्ची खानेपानी स्थायी त होइन तत्काल अस्थायी भए पनि खुवाउँछु। मेलम्चीको खानेपानी तपाईंहरूले अवश्य मेरै कार्यकालमा खान पाउनुहुनेछ भन्ने विश्वास दिलाउन चाहन्छु।’
चौधरीले देश र जनताका लागि काम गर्ने सामाजिक संघ–संस्थाहरूलाई सरकारले सक्दो सहयोग गर्ने आश्वासनसमेत दिए। उहाँले चन्द्रलोक प्रतिष्ठानजस्ता सामाजिक संघ–ंसंस्थाहरूले समाजमा योगदान पुर्याएका व्यक्ति तथा संघ–संस्थाहरूलाई सम्मान गरेर राष्ट्र र जनताको हितमा काम गरिरहेको पनि बताए।
