नेपालका लागि बेलायती राजदूत निकोला पिलोटले नेपालको विकासमा प्रत्यक्ष वैदेशिक लगानी (एफडिआई)ले महत्वपूर्ण भूमिका खेल्ने बताएका छन् । बुधबार नेपाल उद्योग परिसंघका पदाधिकारीसँगको छलफलमा उनले नेपालमा विदेशी लगानी अभिवृद्धिका लागि सहयोग गर्ने प्रतिबद्धता जनाएका हुन् ।
राजदूत पिलोटले नेपालमा लगानीका लागि उपयुक्त वातावरण रहेको भन्दै बेलायती लगानीकर्ता नेपाल भित्र्याउन आफूले पहल गर्ने बताए । ‘नेपालको एफडिआईले महत्वपूर्ण भूमिका खेल्न सक्छ,’ उनले भने । आउँदा दिन वातावरणीय परिवर्तनका दृष्टिकोणले चुनौतीपूर्ण हुने राजदूत पिलोटको भनाइ थियो ।
जलवायु परिवर्तनको प्रभाव न्यूनीकरणका लागि निजी क्षेत्रले काम गर्न सक्ने बताउँदै उनले भने, ‘हरित ऊर्जा प्रवद्र्धनका लागि निजी क्षेत्रले काम गर्न सक्छ ।’ कोभिडको नकारात्मक प्रभाव परेको बताउँदै उनले मानवीय र विकास सहायताको क्षेत्रमा बेलायतले नेपाललाई महत्वपूर्ण सहयोग गरेको उल्लेख गरे ।