- वि.सं २o७८ भदौ २७ आइतबार
सूर्यविनायक नगरपालिका– ३ मा रहेकाे देवडोल कृषि सहकारी संस्थाको पाँचौँ वार्षिक साधारणसभा सम्पन्न भएको छ । शनिबार सम्पन्न साधारणसभामा संस्थाकी अध्यक्ष अम्बिका ढुंगानाले संस्थाको आर्थिक वर्ष ०७७/७८ को कार्य प्रगति विवरण प्रस्तुत गर्दै संस्थामा ९४ जना सदस्यको रु. ३८ लाख सेयर पुँजी कायम रहेको, बचत १६ लाख संकलन भएको र कर्जा लगानी ४६ लाख गरिएको जानकारी गराइन् ।
उनले अघिल्लो आर्थिक वर्षमा कर्जा लगानी गरी प्राप्त ब्याजबाट सबै खर्च कटाई सेयरधनीलाई १० प्रतिशत लाभांश वितरण गरिएको जानकारी दिइन् । त्यस्तै, आर्थिक वर्षमा ०७८/७९ को भावी योजना प्रस्तुत गर्दै सेयर पुँजी रु. १ करोड पुर्याउने र कर्जा लगानी एक करोड ५० लाख गरिने संस्थाको लक्ष्य रहेको उल्लेख गरिन् ।
साधारणसभाले गणेश शाही ठकुरीको अध्यक्षतामा नौ सदस्यीय नयाँ कार्यसमिति निर्विरोध चयन गरेको छ । कार्यसमितिको उपाध्यक्षमा सुनिता नेपाल सचिवमा राजन ढुंगाना, कोषाध्यक्षमा विजेता अधिकारी र सदस्यहरूमा जयराम भट्टराई, लेखनाथ पराजुली, सम्झना दाहाल, नवराज नेपाल र सिर्जना बाँस्तोला छानिएका छन् । सभाले यादवप्रसाद पोखरेललाई लेखा सुपरिवेक्षण समितिको संयोजक तोकेको छ भने ऋण समिति चयन गर्ने जिम्मेवारी नयाँ कार्यसमितिलाई दिएको छ ।
