- वि.सं २o७८ असार २९ मंगलबार
जापान सरकारले नेपाललाई १६ लाख डोज एस्ट्राजेनेका खोप दिने घोषणा गरेको छ । यो अक्सफोर्डको एस्ट्राजेनेकाको जापानमा उत्पादित खोप हो । भारतमा सेरम इन्स्टिच्युटद्वारा निर्मित कोभिसिल्ड खोपजस्तै हो । पहिलो डोज कोभिसिल्ड खोप लगाएकोहरूले यो खोप लगाउन पाउनेछन् ।
कोभ्याक्स सुविधाअन्तर्गत नेपाललाई खोप उपलब्ध गराउन लागिएको नेपालस्थित जापानी राजदूतावासले आज जनाएको छ । जापानका विदेशमन्त्री मोतेगी तोसिमित्सुले आज यो घोषणा गरेको दूतावासले जनाएको छ ।
‘खोप जुलाई मध्यदेखि अगस्ट अन्तिम सातासम्म आपूर्ति हुनेछ,’ दूतावासले भनेको छ । जापानी राजदूत किकुता युताकाले नेपाल र जापानबीच लामो मैत्रीका रूपमा सहयोग घोषणा भएको जानकारी दिए ।
