- वि.सं २o७८ जेठ २९ शनिबार
कांग्रेसको केन्द्रीय कार्यसमितिको बैठक आगामी बिहीबार बस्ने भएको छ । शनिबार बसेको शीर्ष नेताहरूको बैठकपछि सभापति शेरबहादुर देउवाले १४औँ महाधिवेशनको तयारीका सन्दर्भमा छलफल गर्न केन्द्रीय समितिको बैठक बोलाएका हुन् ।
आगामी बिहीबार दिउँसो २ बजे पार्टीको केन्द्रीय कार्यालयमा केन्द्रीय समितिको बैठक बस्ने मुख्यसचिव कृष्णप्रसाद पौडेलले जानकारी दिए ।
बैठकले १४औँ महाधिवेशनको पूर्वतयारीका विषयमा निर्णयहरू गर्नेछ । शनिबार बसेको शीर्ष नेताहरूको बैठकले महाधिवेशनको नयाँ कार्यतालिकाबारे साझा प्रस्ताव तयार गरेको र त्यसमाथि थप छलफल गरी महामारीका बीच कसरी महाधिवेशन सम्पन्न गर्ने भन्नेबारे केन्द्रीय समिति बैठकले निर्णय गर्ने सहमहामन्त्री डा. प्रकाशशरण महतले बताए ।
कांग्रेसले यसअघि भदौ ७ देखि १० गतेसम्मका लागि तोकेको महाधिवेशनको मिति भदौ १६ देखि १९ सम्मका लागि सार्ने प्रस्ताव शनिबारको शीर्ष नेताहरूको बैठकले गरेको छ ।
