- वि.सं २o७८ बैशाख १९ आइतबार
सत्तारुढ एमालेले कोभिड– १९ विरुद्धको तयारीलाई तीव्रता दिन सरकारको ध्यानाकर्षण गराएको छ । प्रधानमन्त्रीको सरकारीनिवास बालुवाटारमा आइतबार बसेको स्थायी कमिटीको आकस्मिक बैठकले आवश्यक पूर्वाधार, खोप, अक्सिजन तथा अत्यावश्यक औषधिको प्रबन्ध गर्न र अन्य तयारीलाई तीव्रता दिन सरकारको ध्यानाकर्षण गराएको हो ।
प्रधानमन्त्रीसमेत रहेका एमाले अध्यक्ष केपी ओलीको अध्यक्षतामा बसेको बैठकले समग्र पार्टीपंक्तिलाई कोभिडविरुद्धको लडाइँमा स्वयंसेवी रूपमा परिचालित हुन पनि आह्वान गरेको एमाले प्रवक्ता प्रदीप ज्ञवालीले जानकारी दिए ।
बैठकपछि ज्ञवालीले प्रेस वक्तव्य जारी गरी भनेका छन्, ‘बैठकले कोभिडका बिरामीको उपचारका लागि आवश्यक पूर्वाधार, शय्याहरू, उपकरण, खोप, अक्सिजन तथा अत्यावश्यक औषधिको तत्काल थप प्रबन्ध गर्न र अन्य तयारी तीव्रताका साथ अगाडि बढाउन सरकारको ध्यानाकर्षण गराउने निर्णय गरेको छ । साथै बैठकले समग्र पार्टीपंक्तिलाई कोभिडविरुद्धको यस कठिन लडाइँमा स्वयंसेवी रूपमा परिचालित हुन पनि आह्वान गरेको छ ।’
