चिसोबाट जोगिन बालिएको घुरबाट भएको आगलागीमा परी सिराहामा एक महिनाभित्र दुईको मृत्यु

चिसोबाट जोगिन बालेको आगोले आगलागी हुँदा एक महिनाको अवधिमा सिराहामा दुईजनाको मृत्यु भएको छ ।

मिर्चैया नगरपालिका ७ मौरहा टोलका बुधबार एक घरमा आगलागी हुँदा आठ वर्षीय बालकको मृत्यु भएको छ । 

चिसोबाट जोगिन घरमा घुर बालेर मो.रफिक राइन परिवारसहित काममा गएका थिए । सोही वेला घरमा आगलागी भएपछि घरमै सुतिरहेका राइनका आठ वर्षीय छोरा जाबिर राइनको जलेर मृत्यु भएको इलाका प्रहरी कार्यालय मिर्चैयाले जनाएको  छ ।

चार छोराछोरीमध्ये जेठो छोरा जाबिरको मृत्यु भएको हो । खरको छानो भएको घर पूर्णरूपमा जलेर नष्ट भएको छ ।

जसबाट घरमा रहेका खाद्यान्न, लत्ताकपडा सबै जलेर नष्ट भएको इलाका प्रहरी कार्यालय मिर्चैयाका प्रमुख प्रहरी नायब उपरीक्षक सन्तुलाल जैसवालले बताए ।

यसअघि २८ मंसिरमा कर्जन्हा नगरपालिका ३ बन्दीपुरका ७० वर्षीय बिल्टु महतो चिसोबाट जोगिन बालेको घुरबाट भएको आगलागीमा परी गम्भीर घाइते भएका थिए । 

थप उपचारको काठमाडौं कीर्तिपुरस्थिति मोडल अस्पतालमा उपचारका क्रममा मृत्यु भएको थियो । 

यता मंसिर अन्तिम सातामा चिसोबाट जोगिन बालेको घुरले आगलागी हुँदा भगवानपुर गाउँपालिका १ का उदयकुमार यादव, कविताकुमारी यादव, सिर्जनाकुमारी यादव, अनुष्का यादव र सुखीपुर नगरपालिका ५ का पिंकी मण्डल घाइते भएका थिए । 

घाइतेहरू उपचारमै रहेको जिल्ला प्रहरी कार्यालय सिराहाका प्रवक्ता डिएसपी शालिग्राम शर्माले बताए ।