बागमती प्रदेशका मुख्यमन्त्री डोरमणि पौडेलले संसद् विघटनबारे प्रतिक्रिया दिँदै बाध्यात्मक परिस्थितिका कारण कदम चालिएको दाबी गरे ।
बाध्यात्मक परिस्थितिका कारण भएको संसद् विघटनको प्रभाव प्रदेश तहमा पनि देखिएको उनले बताए । ‘संसद् विघटनको असर प्रदेश तहमा देखिनु स्वाभाविक हो,’ उनले भने, ‘सरकारको कदम गलत वा सहीबारे मैले केही भन्न चाहिनँ ।’ प्रधानमन्त्री केपी शर्मा ओलीले सोचविचार र व्यापक सल्लाह गरेर संसद् विघटनको कदम चालेको दाबी गर्दै मुख्यमन्त्री पौडेलले असंवैधानिक नभएको प्रतिक्रिया दिए ।
‘कानुन बुझेकाहरूले असंवैधानिक भनिरहेका छन् । अब यसबारे अदालतबाटै टुंगिन्छ,’ उनले भने । केन्द्रीय समितिको बैठकले प्रधानमन्त्री ओलीलाई कारबाही गर्ने निर्णय गरेमा पार्टी औपचारिक रूपमा विभाजनतर्फ उन्मुख हुने उनको भनाइ छ ।