गत शनिबार तोडफोड गरिएको मस्जिद पुनर्निर्माणमा वडाध्यक्षले अवरोध गरेको भन्दै मुस्लिम समुदाय आक्रोशित भएका छन् ।
शनिबार बिहान डोजर लगाएर केही व्यक्तिहरूले सुन्धारामा रहेको मुसाफिर मदिनी मस्जिदमा तोडफोड गरेका थिए ।
पुनर्निर्माणको भइरहेको ठाउँमा वडाध्यक्षसहितको टोलीले अवरोध गरेपछि मुस्लिम आयोगका अध्यक्ष समिम मियाँ अन्सारीसमेत घटनास्थल पुगेका थिए ।
अध्यक्ष अन्सारीले जनताको प्रतिनिधिले जनताको पक्षमा काम गर्नुपर्ने भए पनि भूमाफियाको पक्षमा काम गरिरहेको आरोप लगाए ।
भत्केको ठाउँमा पुनर्निर्माण भइरहेको पाँचौँ दिनमा अवरोधको प्रयास गरी सामाजिक सदभाव खलबलाउने प्रयास भएको उनले बताए ।
स्थानीय लक्ष्मी परियारले भत्केको ठाउँमा पुनर्निर्माण कार्यलाई वडाध्यक्षले निर्माणमा अवराध गरेको बताए । परियारका अनुसार वडाध्यक्षले निर्माणको काम नरोके आफैँ भत्काउने धम्की दिएका छन् ।
निर्माणाधीन धरहराको ठीकपछाडि ६ आना ३ दाम क्षेत्रफलमा रहेको यो मस्जिदको स्वामित्व नेपाल सरकारसँग छ । यसको भोगचलन मस्जिद व्यवस्थापनले गर्दै आएको छ ।
यो मस्जिद ०७२ सालको भूकम्पले धरहरा ढल्दा क्षतिग्रस्त बनेको थियो । यसलाई मुस्लिम समुदायले अस्थायी रूपमा संरचना बनाई प्रयोग गरिरहेका छन् ।
आजभन्दा एक सय वर्षअघि मुस्लिम धर्मावलम्बीहरू काठमाडौं आउजाउ गर्दा नमाज पढने स्थानको रूपमा स्थापित भएको यो मस्जिदमा अहिले पाँच प्रहरको नमाज पढ्न मुस्लिम समुदाय पुग्ने गरेका छन् ।