हजार युवाका लागि सीपमूलक तालिम सुरु

कैलालीको धनगढीमा सीप तथा रोजगार मेला सुरु भएको छ । धनगढी उपमहानगरपालिकाको आयोजनामा सुरु भएको मेलामा सुदूरपश्चिम प्रदेशभरिका एक हजार ४० युवालाई विभिन्न विधाका सीपमूलक तालिम दिइने उपमहानगरले जनाएको छ ।मेलामा युवाहरूलाई ४० दिनसम्म सीपमूलक तालिम दिइनुका साथै तालिमपछि रोजगारीको सुनिश्चितताका लागि रोजगार प्रदायकसँग छलफलसमेत गरिने उपमहानगरले जनाएको छ । दक्ष जनशक्ति तयार गर्ने गरी सीपमूलक तालिमको आयोजना गरिएको नगर प्रमुख गोपाल हमालले बताए । रोजगारदाताले माग गरेको जनशक्ति तयार गर्ने गरी तालिम दिन लागिएको उनले बताए ।

 उपमहानगरका अनुसार ४० दिनसम्म सञ्चालन हुने तालिममा सहभागिताका लागि प्रदेशभरिबाट चार हजार आठ सय ३० ले आवेदन दिएका थिए । त्यसमध्ये अन्तर्वार्ताबाट एक हजार ४० जनालाई छनोट गरिएको हो । अटोमोबाइल, इलेक्ट्रोनिक, मोबाइल मर्मत, पेन्टिङ, मेकानिकल, निर्माण, आतिथ्य सत्कार, सौन्दर्य, लेखा व्यवस्थापन, सूचना प्रविधि, आर्ट एन्ड क्राफ्ट डिजाइनिङलगायतका विधामा निःशुल्क तालिम दिन लागिएको छ ।मेलाको संयोजकसमेत रहेका तालिम तथा रोजगार व्यवसायी महासंघ, सुदूरपश्चिम प्रदेशका अध्यक्ष प्रमोद पाठकले तालिमले बजारमा आवश्यक दक्ष जनशक्ति आपूर्तिमा सहयोग पुग्ने बताए । 

गोपाल हमाल, प्रमुख, धनगढी उपमहानगरपालिका
मेलामा युवाहरूलाई ४० दिनसम्म सीपमूलक तालिम दिइनुका साथै तालिमपछि रोजगारीको सुनिश्चितताका लागि रोजगार प्रदायकसँग छलफलसमेत गरिनेछ । दक्ष जनशक्ति तयार गर्ने गरी सीपमूलक तालिमको आयोजना गरिएको हो ।