ओडिसामा प्रकृति लम्सालको नाममा छात्रवृत्ति घोषणा

भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआइआइटी)ले आइतबार मृत्युवरण गरेकी नेपाली विद्यार्थी प्रकृति लम्सालको सम्झनामा बर्सेनि एकजना नेपाली विद्यार्थीलाई निःशुल्क छात्रवृत्ति दिने घोषणा गरेको छ । केआइआइटी विश्वविद्यालयका संस्थापक अच्युत सामन्तले बिहीबार छात्रवृत्ति घोषणा गरेका हुन् । केआइआइटीले छात्रवृत्ति दिने घोषणा गरेको सामाजिक सञ्जाल एक्समार्फत जनाइएको छ ।

सोमबार अपमानपूर्वक छात्रावासबाट निकालिएका र नेपाल नफर्केका थप २० जना विद्यार्थी बिहीबार विश्वविद्यालय पुगेका छन् । अहिलेसम्म १५० जना नेपाली विद्यार्थी कक्षामा सहभागी भएका छन् । ‘बिहीबार स्वर्गीय प्रकृति लम्सालको नाममा नेपाली विद्यार्थी एकजनालाई बर्सेनि छात्रवृत्ति दिने घोषणा भयो । कोलकाता पुगेका ११ जना र ओडिसाकै कटकमा रहेका नौजना नेपाली विद्यार्थी विश्वविद्यालय फर्केका छन्, विद्यार्थीहरू कक्षामा सामेल भएका छन्,’ भुवनेश्वरमा रहेका नेपाल प्रहरीका एसएसपी एवं नेपाली दूतावास दिल्लीका काउन्सिलर सञ्जीव शर्मा दासले नयाँ पत्रिकासँग भने । 

प्रकृतिको नाममा नेपाली विद्यार्थीका लागि छात्रवृत्ति घोषणा हुनु ठुलो विषय भएको उनले बताए । ‘संस्थापक सामन्तले प्रकृतिका बुबा र काकालाई भेटेर प्रकृतिको सदाकालको सम्झना र सम्मानमा उनको बुबाको इच्छाअनुसार हाम्रो प्रयासमा छात्रवृत्ति घोषणा गरेका छन्,’ शर्माले भने, ‘हरेक वर्ष एकजना नेपाली विद्यार्थीका लागि प्रकृति लम्सालका नाममा विशेष छात्रवृत्ति उपलब्ध हुनेछ । एकजना नेपालीले निःशुल्क पढ्ने व्यवस्था पाउनु उपलब्धि हो ।’ विश्वविद्यालयले नेपाल आएका विद्यार्थी र उनका अभिभावकका नाममा सामूहिक इमेल पठाएको छ । विश्वविद्यालय र छात्रावासमा सुरक्षाको पूर्ण प्रत्याभूति भएको, विद्यार्थी नेपाल पुगेको र फर्केको यातायात खर्च विश्वविद्यालयले उपलब्ध गराउने तथा सोमबार उनीहरूलाई निकाला गर्ने सूचना र व्यवहारप्रति क्षमायाचनासहितको इमेल पुगेको छ । 

यसैगरी बिहीबार ओमानबाट स्वदेश फर्किएकी परराष्ट्रमन्त्री डा. आरजु राणा देउवाले केआइआइटी विश्वविद्यालयमा अध्ययनरत नेपाली विद्यार्थी प्रकृति लम्सालको मृत्यु र त्यसपछि नेपाली विद्यार्थीलाई निकालिएपछिको घटनाक्रम कूटनीतिक रूपमा समाधान भएको बताएकी छिन् । 

स्वर्गद्वारी घाटमा अन्त्येष्टि 
प्रकृति लम्सालको बिहीबार बिहान रुपन्देहीको स्वर्गद्वारी घाटमा अन्त्येष्टि गरिएको छ । उनको पार्थिव शरीरमा हजुरबुबा देवनाथ लम्सालले दागबत्ती दिए । बुधबार राति नेपाल ल्याइएको उनको पार्थिव शरीरलाई भैरहवा परिक्रमा गराई स्वर्गद्वारी घाटमा पुर्‍याइएको थियो ।